Menntamálaráðherra í vanda vegna DR

Átökin um Danska ríkisútvarpið teygja nú anga sína inn í stjórnarráðið. Þá eru starfsmenn ósáttir við meinta óráðsíu í meðförum fjármuna útvarpsins.

Það á að segja 300 starfsmönnum Danska ríkisútvarpsins upp en á sama tíma eru 120 stjórnendur útvarpsins á leið á námskeið í Sílíkondal í Kaliforníu og kostar það útvarpið samtals 3,6 milljónir danskra króna. Þessi staðreynd hefur vakið mikla reiði á meðal starfsmanna útvarpsins sem margir hverjir lögðu niður vinnu fyrr í vikunni til að mótmæla uppsögnunum. Þeir segja vart bætandi á 1,7 milljarða framúrkeyrslu á áætluðum kostnaði við nýja útvarpsmiðstöð á Amager.

Þá hefur ríkisstjórn Anders Fogh Rassmussen þurft að standa af sér stormviðri síðustu daga en fram kemur í ævisögu fyrrverandi útvarpsstjóra DR, sem enn er óútkomin en birtir hafa verið kaflar úr, að ríkisstjórnin hafi ætlað að einkavæða útvarpið og hafi markvisst unnið að fylgi við þá stefnu. Danir hafa verið mjög samstíga um að ríkisreka útvarpið.

Þá segir útvarpsstjórinn fyrrverandi líka að menntamálaráðherrann Brian Mikkelsen hafi gagngert reynt að hafa áhrif á ritstjórnarstefnu DR, aðallega í þeim tilgangi að fá jákvæðari umfjöllun um ríkisstjórnarflokkana. Útvarpsstjórinn segist sanna þetta með því að birta bréf frá ráðherranum.

Menntamálaráðherrann Mikkelsen hefur vísað ásökunum útvarpsstjórans á bug og segist eingöngu hafa með bréfinu verið að tjá skoðanir sínar, enda hafi ráðherrar skoðana- og málfrelsi eins og aðrir.