Fundu höfuð sprengjumannsins

Lögreglan í Pakistan segist hafa fundið höfuð eins þeirra sem grunaðir eru um að hafa staðið fyrir sprengjuárás sem varð 136 manns að bana þegar Benazir Bhutto kom til landsins í gær. Líkamsleifar mannsins voru rannsakaðar í dag og lögreglan sagði að til stæði að gera ítarlegri grein fyrir málavöxtum fljótlega. Yfirvöld í Pakistan bjóða því sem nemur fimm milljónum íslenskra króna þeim sem gætu veitt upplýsingar sem leiði til handtöku í málinu. Bhutto var á leið frá flugvellinum við heimkomu til Pakistan eftir átta ára útlegð þegar sprengjan sprakk í gær. Hún og samferðarmenn hennar sluppu ómeidd.