„Ég er Al Gore“

"Ég er Al Gore, og ég var næsti forseti Bandaríkjanna," hefur friðarverðlaunahafi Nóbels gjarnan sagt í kynningu á sjálfum sér.

Gore hlaut friðarverðlaunin í ár ásamt alþjóðlegri nefnd Sameinuðu þjóðanna um loftlagsmál. Verðlaunin voru veitt fyrir að vekja athygli á þeirri hættu sem stafar að heiminum af völdum loftslagsbreytinga.

Al Gore hefur látið til sín taka í umhverfismálum með ýmsum hætti en hefur síðustu ár tileinkað krafta sína málefninu og ferðast um heiminn til að auka vitund almennings á vandamálinu. Bakgrunnur

Gore er sonur Albert Arnold Gore þingmanns frá Tennessee og Pauline LaFon Gore, sem var ein fyrsta konan til að útskrifast frá lagadeild Vanderbilt háskólans. Fjölskyldan bjó bæði á hótelherbergi í Washington og í Carthage Tennessee þar sem Al vann á bóndabæ fjölskyldunnar á sumrin.

Eiginkona hans er Mary Elisabeth "Tipper" Gore og þau eiga fjögur börn og eitt barnabarn. Störf friðarverðlaunahafansAl Gore var forsetaefni demókrata í forsetakosningunum árið 2000 sem voru umdeildustu kosningar í sögu Bandaríkjanna. Hann fékk hálfri milljón fleiri atkvæði en Bush en færri kjörmenn. Bandaríska kosningakerfið er flókið, en eftir að niðurstöðurnar höfðu velkst um í dómskerfinu úrskurðaði hæstiréttur að Bush væri sigurvegari og því forseti Bandaríkjanna.

Gore gegnir stöðu forseta bandarísku sjónvarpsstöðvarinnar Current TV sem vann Emmy verðlaun fyrr á árinu fyrir framúrskarandi þróun á gagnvirku sjónvarpi. Hann er einnig stjórnarformaður í Generation Investment Management, í stjórn Apple tölvufyrirtækisins auk þess að vera óopinber ráðgjafi yfirstjórnenda Google og stjórnarformaður umhverfissamtakanna Alliance for Climate Protection. Verðlaunafé friðarverðlaunanna sem kemur í hlut Gore munu að öllu leiti renna til samtakanna.

Varaforsetinn fyrrverandi hefur löngum haft áhuga á umhverfismálum. Hann var einn þeirra sem kom Kyoto samkomulaginu á og þrátt fyrir andstöðu Bandaríkjaþings skrifaði hann undir samninginn árið 1998, en Bandaríkin neituðu að skrifa undir samninginn árinu áður.

Hann tilkynnti árið 2002 að hann myndi ekki keppast við Bush um forsetaembættið árið 2004 og gagnrýndi Bush fyrir stríðið í Írak. ÓskarsverðlaunGore ferðast um heiminn og heldur fyrirlestra um hlýnun jarðar sem hann kallar "loftslagskrísuna." Hann var kynnir í heimildarmyndinni An Inconvenient Truth - Óþægilegur Sannleikur - sem hlaut Óskarsverðlaun fyrir bestu heimildarmyndina í fyrra og er höfundur bókar í tengslum við myndina. Bókin hefur verið á lista New York Times yfir mest seldu bækur frá því í júní á síðasta ári.

Samtökin Save Our Selves sem Gore stofnaði skipulögðu meðal annars góðgerðartónleikana Live Earth í júlí á þessu ári sem miðaði að því að efla vitund almennings um loftslagsbreytingar. Hann tilkynnti þátttöku sína í sjónvarpsþættinum "60 sekúndur til að bjarga jörðinni" ásamt kvikmyndaleikkonunni Cameron Diaz og vonaðist þannig til að vekja enn frekar athygli á málefninu.

Í febrúar á þessu ári tilkynntu Gore og Richard Branson eigandi Virgin flugfélagsins Virgin Earth challenge samkeppnina. Hún býður 25 milljónir bandaríkjadala í verðlaun handa þeim sem finnur upp tæki eða hönnun sem leiðir til útrýmingu gróðurhúsalofttegunda.