Drap þrjá fyrir Pinochet

Osvaldo Romo, sem var liðsmaður öryggissveita Augustos Pinochets (einræðisherra í Chile á árunum 1973-1990) lést af völdum hjarta- og öndunartruflana í fangelsi í Chile á miðvikudag sjötugur að aldri.

Osvaldo hafði verið dæmdur í fimmtán ára fangelsi fyrir að myrða þrjá andstæðinga stjórnar Pinochets. Hann átti yfir höfði sér að vera sóttur til saka fyrir mörg önnur brot sem talið er að hann hafi framið.

Samkvæmt opinberum tölum frá Chile voru tæplega 3.200 manns myrtir og mörg þúsund voru pyntaðir í valdatíð Pinochets sem lést í desember 2006.