Blair ætlaði að segja af sér

Tony Blair, fyrrverandi forsætisráðherra Englands, var búinn að ákveða að segja af sér nokkrum mánuðum áður en Íraksstríðið hófst í mars árið 2003. Þetta segir Alastair Campbell, fyrrverandi fjölmiðlafulltrúi forsætisráðherrans, í dagbókum sínum „The Blair Years“ sem verða gefnar út í dag.

Að sögn Campbells ætlaði Blair að tilkynna afsögn sína á flokksþingi Verkamannaflokksins í september árið 2002; hugmynd hans var að láta af embætti fyrir næstu kosningar í landinu sem haldnar voru árið 2005.