Ætla að samþykkja stofnsáttmálauppfærslu

Lissabon, AP Leiðtogar hinna 27 aðildarríkja Evrópusambandsins söfnuðust saman í Lissabon í gær á tveggja daga leiðtogafund þar sem til stendur að binda enda á tveggja ára „stjórnarskrárkreppu“ sambandsins. Það á að gera með því að samþykkja nýja uppfærslu stofnsáttmálans sem ekki felur í sér eins umfangs­miklar breytingar og stjórnarskrársáttmálinn svonefndi sem felldur var í þjóðaratkvæðagreiðslum í Frakklandi og Hollandi snemmsumars 2005. Umbótasáttmálinn svonefndi, sem nú er á borði leiðtoganna, var samþykktur í drögum á leiðtogafundi í júní síðastliðnum, og síðan hefur lagatæknileg útfærsla hans verið fullgerð á ríkjaráðstefnu. Kröfur Ítala, Breta og Pólverja um vissar breytingar á lokadrögunum gætu sett samkomulag í uppnám. Romano Prodi, forsætisráðherra Ítalíu, hótaði á miðvikudag að beita neitunarvaldi gegn samþykkt sáttmálans ef ekki yrði horfið frá því að fækka sætum Ítala á Evrópuþinginu. Fyrirhugað er að fækka fulltrúum á þinginu úr alls 785 í 750 og til að ná því fram er gert ráð fyrir að fulltrúum 17 af aðildarríkjunum 27 fækki. Fulltrúum Ítalíu myndi fækka úr 78 í 72, og Ítalía þar með missa jafnræði á við Frakkland og Bretland. Mikil samstaða er um það á ítalska þinginu að una þessu ekki. - aa