Ætla að vinna náið saman

Þeir Gordon Brown, forsætisráðherra Bretlands, og Nicolas Sarkozy Frakklandsforseti stefna að náinni samvinnu á næstu árum. Þeir ætla meðal annars að stilla saman strengi sína gegn alþjóðlegri hryðjuverkastarfsemi. Sömuleiðis ætla þeir að vinna saman að lausn á hörmungum íbúanna í hinu stríðshrjáða Darfúrhéraði í Súdan.

„Við Gordon Brown höfum báðir vilja til þess að vinna saman að öllum þeim málefnum sem við ræddum um, styrkja tengsl Bretlands og Frakklands og taka sameiginlega frumkvæði í málum,“ sagði Sarkozy að loknum fundi þeirra í París í gær.

Sarkozy segir að þeir ræðist við í síma næstum vikulega, og þeir hafa ákveðið að hittast reglulega til þess að bera saman bækur sínar, meðal annars áður en leiðtogafundir Evrópusambandsins eru haldnir.

Á fundi sínum í gær beindu þeir athygli sinni sérstaklega að Darfúrhéraði og hyggjast báðir ferðast þangað í þeirri von að geta hjálpað til við að koma á friði.

Báðir eru þeir Brown og Sarkozy nýteknir við embætti, hvor í sínu landi, en samskipti forvera þeirra, þeirra Tonys Blair og Chacques Chirac, einkenndust oft af misjafnlega djúpstæðum ágreiningi, meðal annars ágreiningi um Íraksstríðið og Evrópusambandið.