Brúður sló brúðguma með skó

Lögregla handtók skoska brúður og lét hana dúsa yfir helgi í fangaklefa fyrir að ráðast á brúðguma sinn með háhæluðum skó á brúðkaupsdegi þeirra í vor.

Konan var handtekin í hótelherbergi þeirra nýgiftu á meðan á brúðkaupsveislunni stóð á neðri hæðinni. Brúðguminn hafði náð að staulast niður í anddyri. Blóð­ugt handklæði huldi andlit hans.

Konan sagði lögreglunni að ásakanir hefðu gengið á víxl milli hjónanna, án þess að útskýra nánar. Hún sagðist hafa lamið manninn í sjálfsvörn. Lögmaður konunnar segir hana vera á þunglyndislyfjum og hafa drukkið í óhófi.