Kosið um fóstureyðingar í Mexíkó

Löggjafarþing Mexíkóborgar, höfuborgar Mexíkó, greiddi í gær atkvæði um hvort lögleiða beri fóstureyðingar á fyrstu tólf vikum meðgöngu. Skoðanakannanir sýna að meirihluti íbúa Mexíkóborgar styðja frumvarpið og fyrirfram var búist við því að frumvarpið yrði samþykkt.

Kaþólska kirkjan hefur harðlega mótmælt frumvarpinu og forseti Mexíkó, Felipe Calderon, hefur lýst sig andvígan því.

Í Mexíkó eru fóstureyðingar aðeins löglegar þegar um er að ræða nauðganir, verulega fæðingargalla eða ef líf móðurinnar er í hættu.

Talið er að árlega fari um 200.000 konur fari í ólöglegar fóstureyðingar í Mexíkó út frá þeim fjölda kvenna sem leitar sér læknisaðstoðar á sjúkrahúsum vegna fylgikvilla slíkra fóstureyðinga að sögn Mörthu Micher, forstjóra Kvennastofnunar Mexíkóborgar. Micher segir um 1.500 konur deyja árlega vegna fylgikvilla ólöglegra fóstureyðinga sem samsvarar meira en fjórum konum á hverjum einasta degi.

Einungis tvö ríki í Suður-Ameríku, Kúba og Gvæjana, hafa lögleitt fóstureyðingar fyrir allar konur. Flest ríki leyfa fóstureyðingar aðeins ef um nauðgun er að ræða eða ef að heilsa móðurinnar sé í hættu. Fóstureyðingar eru alfarið bannaðar í Nígaragva, El Salvador og Chile.