Skipulagði hryðjuverkin 11. september

Sakborningurinn Khalid Sheikh Mohammed hefur játað fyrir bandarískum herdómstóli að hafa skipulagt og stutt framkvæmd 31 hryðjuverkaárásar, þar á meðal hryðjuverkin í Bandaríkjunum 11. september árið 2001. Hryðjuverkin áttu sér stað frá árinu 1990 og létust þúsundir óbreyttra borgara í þeim.

Mohammed játaði einnig að hafa myrt blaðamann Wall Street Journal, David Pearl, árið 2002 en aftaka hans vakti heimsathygli. Á myndbandi sem var sett á netið sést hvernig Pearl er afhöfðaður af grímuklæddum manni sem reyndist vera Mohammed.

Mohammed greindi jafnframt frá fyrirhuguðum hryðjuverkum sem yfirvöld höfðu náð að koma í veg fyrir, svo sem áætlun um að myrða nokkra fyrrverandi forseta Bandaríkjanna. Meðal sérstakra skotmarka sem Mohamm-ed tilgreindi voru Jóhannes Páll páfi II, Bill Clinton, fyrrverandi forseti Bandaríkjanna, og Pervez Musharaff, forseti Pakistan.

„Ég var ábyrgur fyrir aðgerðinni 9. september frá A til Ö," sagði Mohammed í yfirlýsingu sem herlögmaður hans las upp við yfirheyrslur síðastliðinn laugardag. Varnamálaráðuneyti Bandaríkjanna birti afrit af yfirheyrslunum á miðvikudagskvöld.

Ekki hefur sést til Mohammed síðan myndir birtust af honum strax eftir að hann var handtekinn í mars árið 2003. Ekkert spurðist til hans í þrjú ár meðan hann var í leynilegu haldi hjá leyniþjónustu Bandaríkjanna (CIA). Í fyrra tilkynnti George W. Bush Bandaríkjaforseti að Mohammed hefði, ásamt þrettán öðrum grunuðum hryðjuverkamönnum, verið fluttur í fangelsið á Guantanamo-flóa.

Yfirheyrslur yfir sakborningunum fjórtán hófust á föstudaginn síðastliðinn og er tilgangur þeirra að skera úr um hvort þeir teljist „óvinveittir bardagamenn".

Verði mennirnir fjórtán sakfelldir er hægt að halda þeim um óákveðinn tíma og réttað verður yfir þeim af sérstökum herdómstólum á grundvelli laga um sérstaka herdómstóla sem Bush undirritaði í október. Lögin þykja umdeild vegna þess að dómstólunum verður heimilt að nota vitnisburð sem fenginn er með umdeildum yfirheyrsluaðferðum. Einnig verður heimilt að nota upplýsingar, sem fangarnir sjálfir fá ekki að sjá, til þess að sakfella þá.