Dómarinn neitar að víkja

Iftikhar Mohammed Chaudhry, yfirdómari hæstaréttar í Pakistan, neitar að taka mark á valdboði Pervez Musharraf forseta, sem gerði sér lítið fyrir og rak Chaudry úr embætti í lok síðustu viku.

Chaudry segir ekkert hæft í ásökunum um að hann hafi misnotað embætti sitt og segist ætla að sitja sem fastast, hvað sem líður orðum forsetans. Æðstaráðs dómsmála í Pakistan sem hefur úrskurðarvald í málinu og kemur næst saman í dag.

Lögfræðingar í Pakistan eru æfir vegna málsins og ásaka Musharraf um ólögmæt pólitísk afskipti af dómsvaldinu.

Á mánudaginn efndu lögfræðingar til mótmælafunda víða um land, mættu ekki til dómsstarfa og lentu sums staðar í hörðum átökum við lögregluna. Í gær héldu um 300 þeirra áfram mótmælaaðgerðum í Karachi, stærstu borg landsins.

Stjórnvöld segja brottrekstur Chaudrys fullkomlega í samræmi við stjórnarskrá landsins. Hann hafi gerst brotlegur í starfi og endanlegur úrskurður sé í höndum æðstaráðsins.

Vera má að Chaudry hafi komið við kaunin á Musharraf á síðasta ári þegar hann lagði mikla áherslu á að fá upplýsingar um tugi manna, sem leyniþjónusta landsins var sökuð um að hafa í haldi.