Flugskeytaárás á Gaza-borg

17 ára Palestínumaður beið bana þegar Ísraelsher gerði flugskeytaárás á bæinn Beit Lahiya í gærkvöldi. Herinn gerði einnig árás á meintar bækistöðvar palestínskra vígamanna í Gaza-borg, en að sögn talsmanns palestínskra yfirvalda féll enginn í þeirri árás.

Árásirnar voru gerðar eftir að liðsmaður palestínsku samtakanna Heilagt stríð varð níu manns að bana í sjálfsmorðsárás fyrir framan skyndibitastað við aðalumferðarmiðstöð Tel Aviv í Ísrael í gær.

50 særðust í tilræðinu. Árásin var sú mannskæðasta í Ísrael í meira en ár, og óttast er að með árásunum í gær sé hafin ný hrina árása fyrir botni Miðjarðarhafs.