Flóðin hvergi í rénun

Það er af sem áður var þegar sungið var um Dóná svo bláa. Vegna votviðris og vorleysinga hamast hún kolmórauð áfram og hefur yfirborð hennar ekki verið hærra í rúma öld. Búist er við að rennslið í henni nái hámarki í kvöld eða á morgun en það er nú sextán þúsund rúmmetrar á sekúndu. Til samanburðar er meðalrennsi Þjórsár 360 rúmmetrar á sekúndu. Í Serbíu var vatnshæðin sums staðar farin að slaga hátt upp í tíu metra í dag og þar áttu íbúar flóðasvæðanna fullt í fangi með að verjast vatnselgnum. Þær varnir sem fyrir eru hafa veikst umtalsvert enda orðnar mettaðar af vatni. Í Rúmeníu hafa yfirvöld brugðið á það ráð að rjúfa garða og veita ánni á nálæga akra til að létta örlítið á henni. Fjöldi fólks sem orðið hefur að yfirgefa heimili sín hefst við í tjöldum og skýlum en ekki er vitað hvenær það getur snúið aftur til síns heima. En það flæðir víðar í Evrópu en á vatnasvæði Dónár. Úrhellisrigning í Kákasusríkinu Georgíu varð til þess að þorpið Tskorí, sem er skammt vestur af höfuðborginni Tíflis, fór hreinlega á kaf í morgun. Þorpsbúar áttu fótum fjör að launa en allir komust að lokum í öruggt skjól, sumir þó örlítið votir í fæturna.