Castro fjarri eigin afmælishátíð

Fidel Castro Kúbuleiðtogi hefur verið of veikur til þess að koma fram opinberlega á fimm daga afmælishátíð hans sjálfs, sem varð áttræður í sumar.

Í orðsendingu, sem Castro lét lesa upp á opnunarsamkomu afmælishátíðarinnar á þriðjudagskvöldið, sagðist hann „ekki enn kominn í það ástand, að því er læknar segja, að geta tekið á móti svo gríðarlegum mannfjölda“.

Castro veiktist alvarlega í sumar og hefur aðeins einu sinni komið fram á opinberum vettvangi síðan. Hann varð áttræður þann 13. ágúst, en vegna veikindanna var ákveðið að fresta afmælishátíðinni og að ósk Castros var ákveðið að tengja hana hátíðarhöldum vegna fimmtíu ára afmælis byltingarinnar á Kúbu, sem verða í dag.

Í dag ná jafnframt hátíðarhöldin á Kúbu hámarki með gríðarmikilli hersýningu í höfuðborginni Havana. Búist er við fjölda erlendra gesta en óvíst er hvort Castro sér sér fært að mæta.

Castro fól í sumar bróður sínum, Raúl Castro, að taka að sér stjórnina meðan hann væri að jafna sig á veikindunum.

Stjórnvöld á Kúbu fullyrða að Castro sé á batavegi, en bandarísk stjórnvöld telja hann hins vegar vera illa haldinn af ólæknandi krabbameini og muni vart lifa út næsta ár.