Telja að 600 þúsund hætti að reykja með reykingabanni

Breska ríkisstjórnin áætlar að 600 þúsund manns muni hætta að reykja eftir að reykingarbann tekur gildi í landinu þann 1. júlí næstkomandi, en bannið nær til allra opinberra bygginga.

Bannið mun einnig ná yfir skrifstofur, verksmiðjur, klúbba og bari, en ekki til heimila eða svæða utan dyra. Ráðherrar segja að bannið muni vernda almenning frá óbeinum reykingum en andstæðingar þess segja það harðneskjulegt. Krabbameinssamtök fagna hins vegar banninu og segja daginn verða sögulegan. Kostnaður við að innleiða bannið er áætlaður um sjö milljarða íslenskra króna. Þess má geta að reykingabann tekur einnig gildi hér á landi næsta sumar.