Jafnrétti kynjanna eykst á Íslandi

Samkvæmt nýrri skýrslu World Economic Forum er Ísland í 4. sæti yfir þjóðir þar sem jafnrétti kynjanna er komið hvað lengst á veg. Svíþjóð skipar efsta sætið, Noregur annað sætið, Finnland það þriðja og Íslendingar það fjórða.

Röð 10 efstu landa er sem hér segir:

1. Svíþjóð

2. Noregur

3. Finnland

4. Ísland

5. Þýskaland

6. Filippseyjar

7. Nýja Sjáland

8. Danmörk

9. Bretland

10. Írland

Í skýrslunni kemur jafnframt fram að ekkert land hefur náð fullkomnu jafnræði en hún tiltekur fjögur svið og eru þau efnhagsleg þátttaka, menntun, heilsa og stjórnmálaþátttaka. Staða kvenna er mæld á hverju sviði fyrir sig og þannig á að vera hægara um vik að gera úrbætur á þeim sviðum.

Nokkrir áhugaverðir punktar koma fram í skýrslunni en hún sýnir að konur á Íslandi eiga enn töluvert í land varðandi stjórnmálaþátttöku en standa sig einna best í menntun og samkvæmt skýrslunni eru mun fleiri konur en karlmenn í háskólanámi á Íslandi.

Áhugasamir geta leitað frekari upplýsinga á vefsíðu World Economic Forum en hún er www.weforum.org