Þörf á frekari kynfræðslu í Evrópu

Sérfræðingar á heilbrigðissviði hvöttu í gær Evrópulönd til að auka kynfræðslu ungs fólks og sögðu gríðarlegan mun vera á þessu námsefni innan álfunnar. Kynfræðsla er skylduefni í skólum flestra landa, en ekki í Búlgaríu, Bretlandi, Póllandi og á Kýpur og Ítalíu.

„Við hvetjum löndin öll til að að sýna meiri áhuga á kynfræðslu,“ sagði Gunta Lazdane, talsmaður Evrópudeildar Alþjóðaheilbrigðismálastofnunarinnar, en stofnunin stóð, ásamt háskólanum í Lund í Svíþjóð og fleirum, að 94 síðna skýrslu um kynfræðslu í 26 Evrópulöndum. Þar er hvatt til þess að í kynfræðslu í skólum sé sinnt frekar upplýsingum sem geta hjálpað ungmennum að taka ákvarðanir sem varða kynlíf, en minna um kynsjúkdóma.

Á meðan kynfræðslu er vel tekið á Norðurlöndunum og í Hollandi, er almenningur mikið á móti henni í löndum svo sem Tékklandi, Þýskalandi, Írlandi og Póllandi.

„Áhrif trúar eru mun meiri í sumum löndum,“ sagði Vicky Clayes, sem vann að skýrslunni.

Íslensk ungmenni fara að stunda kynlíf yngst allra Evrópubúa, eða 15,7 ára. Slóvakar, aftur á móti, eru elstir Evrópubúa þegar þeir byrja að stunda kynlíf, eða 18 ára.

„Það er ekki aldurinn sem skiptir máli, heldur hvenær unga fólkið er tilbúið til þess,“ bætti Ladzane við.