Fær ekki viðhafnarútför

Einræðisherrann fyrrverandi, Augusto Pinochet, verður borinn til grafar í dag. Þjóðarsorg var ekki lýst yfir í landinu og fær Pinochet enga viðhafnarútför, þótt hefð sé fyrir því að fyrrum forsetar Chile fái slíka útför. Í stað þess verður hann jarðsettur að hermannasið.

Tilfinningar Chile-manna voru vægast sagt í miklu uppnámi þegar fregnir af láti Pinochets bárust á sunnudag. Sumir opnuðu kampavínsflöskur og dönsuðu á götum úti, aðrir grétu beisklega og enn aðrir lentu í útistöðum við lögregluna, en 99 manns voru handteknir aðfaranótt mánudagsins í átökum í Santíagó þar sem 43 lögreglumenn slösuðust.

Fórnarlömb Pinochets og ættingjar þeirra urðu að gefa upp vonina um að einræðisherrann fyrrverandi yrði nokkurn tímann dæmdur fyrir glæpi unna á valdatíma hans.

Pinochet leiddi valdarán hersins í Chile árið 1973, þegar sósíalíska forsetanum Salvador Allende var steypt af stóli. Sáu margir Chile-menn Pinochet sem bjargvætt þeirra frá kommúnisma, en hann stýrði landinu með járnaga fram til ársins 1990.

Chileska ríkisstjórnin hefur sagt að á meðan á valdatíma hans stóð hafi yfir þrjú þúsund manns verið myrtir, fleiri en eitt þúsund manns horfið sporlaust og talið er að nær þrjátíu þúsund manns hafi sætt pyntingum. Þúsundir Chile-manna voru jafnframt neyddir í útlegð. Faðir núverandi forseta Chile, Michelle Bachelet, var mikill andstæðingur Pinochet og lést hann eftir að hafa sætt pyntingum undir stjórn einræðisherrans.

Pinochet var aldrei dæmdur fyrir mannréttindabrot, því bágt andlegt og líkamlegt heilsufar hans seinustu árin hefur ætíð komið honum undan réttarhöldum.

Hann var hnepptur í stofufangelsi nýverið, ákærður fyrir mannréttindabrot og skattsvik. Skömmu áður hafði hann sent frá sér yfirlýsingu, þar sem hann sagðist taka „pólitíska ábyrgð á öllu sem gerðist“ í stjórnartíð hans, en minntist þó ekki á mannréttindabrot.

Þótt Pinochet sé minnst sem einvalds sem sinnti lítt um rétt andstæðinga sinna, lagði hann samt sem áður grunninn að stöðugum efnahag landsins sem áður var í molum.

Skrifstofa Margaret Thatcher, fyrrverandi forsætisráðherra Bretlands, sagði að Thatcher væri „ákaflega sorgmædd“ yfir fráfalli Pinochet, en talsmaður Hvíta hússins sagði Bandaríkjastjórn vera hugsað til fórnarlamba stjórnartíðar hans.