Kjördagur í Bandaríkjunum

Bandaríkjamenn ganga til kosninga í dag og kjósa sér þingmenn í báðum deildum þingsins. Frambjóðendur nýttu síðasta tækifærið til að koma skilaboðum sínum til kjósenda í gærkvöld. Síðustu skoðanakannanir sýndu að Repúblikanar höfðu saxað mjög á forskot Demókrata og dvínuðu því sigurvonir þeirra, um að fella meirihluta Repúblikana í báðum þingdeildum.

Fjöldi Bandaríkjamanna hefur þegar kosið utan kjörfundar en þeir sem eiga það eftir kjósa í dag í sinni heimabyggð á þar til gerðum kosningavélum. Kosið er um þriðjung þingmanna í öldungadeildinni og alla þingmenn fulltrúadeildarinnar, auk þess sem 36 fylkisstjórastöður eru lausar.

Demókratar þurfa að fjölga sætum sínum í öldungadeildinni um 6 til þess að ná undirtökunum í efri deildinni. Þeir þurfa 15 fleiri sæti en þeir hafa nú í fulltrúadeildinni til að hafa meirihluta þar líka. Nái þeir meirihluta í báðum deildum veikir það mjög stöðu Bush forseta, sem er Repúblikani.