Norskir kjósendur snúast til hægri

Niðurstöður nýrra fylgiskannana í Noregi benda til þess að borgaraflokkarnir haldi meirihluta á norska þinginu. Mestu munar um að Vinstriflokkurinn, lítill frjálslyndur hægriflokkur, nær fjögurra prósenta markinu í tveimur nýjum könnunum og fengi allt að tíu þingsæti í stað tveggja. Þá er Framfaraflokkurinn, með Carl. I. Hagen í broddi fylkingar, með um 20 prósenta fylgi í báðum könnununum. Að sama skapi tapar Sósíalíski vinstriflokkurinn umtalsverðu fylgi samkvæmt könnun sem fyrirtækið Sentrio gerði fyrir nokkur norsk dagblöð eða heilum sjö prósentustigum miðað við síðustu könnun þess. Rauðgræna bandalagið svonefnda, sem myndað er af Verkamannaflokknum, Sósíalíska vinstriflokknum og Miðflokknum, fer talsvert niður fyrir 50 prósenta markið í báðum könnununum, en fylgi þeirra hefur samanlagt verið talsvert yfir 50 prósenta markinu um langt skeið. Samanlagt fylgi þeirra er 44,7 prósent í könnun Sentrio en 47,7 prósent í könnun Gallup. Þessar niðurstöður benda til þess að borgaraflokkarnir haldi meirihluta þingsæta í kosningunum á mánudag og er þetta í fyrsta skipti um í tvö ár sem kannanir sýna meirihlutafylgi þeirra. "Sósíalíski vinstriflokkurinn veit ekkert í hvorn fótinn hann á að stíga, hvort hann eigi að vera róttækur flokkur eða miða kosningabaráttuna við að komast í ríkisstjórn," segir Anders Todal Jensen, en hann er sérfróður um kosningar. Hann telur að vaxandi spenna síðustu dagana fyrir kosningar komi Verkamannaflokknum og Framafaraflokknum til góða en tæplega Sósíalíska vinstriflokknum sem Anders Todal telur að hafi spillt möguleikum sínum. Hann bendir jafnframt á að liðsöfnun og baráttuaðferðir Vinstrifllokksins undanfarið hafi skilað góðum árangri. "Þegar flokkurinn nær fjögurra prósenta markinu breytist öll myndin og mörg þingsæti flytjast frá vinstri til hægri," segir Anderes Todal Jensson í samtali við Aftenposten.