Efnahagsumbætur lykilatriði

Viðræður um myndun samsteypustjórnar tveggja stærstu flokka Þýskalands munu fara út um þúfur takist ekki að koma trúverðugri aðgerðaáætlun um víðtækar efnahagsumbætur inn í stjórnarsáttmálann. Þetta sagði einn forystumanna kristilegra demókrata, flokks Angelu Merkel væntanlegs kanslara, í gær. Gerhard Schröder, fráfarandi kanslari, tók af skarið um það í gær að hann muni ekki verða í neinu hlutverki í hinni væntanlegu ríkisstjórn. Að Schröder eftirléti Merkel kanslarastólinn í samsteypustjórn flokka þeirra var forsenda fyrir samkomulagi sem flokkarnir náðu í byrjun vikunnar um að hefja formlegar stjórnarmyndunarviðræður. Jafnaðarmenn tryggðu sér hins vegar í staðinn mörg lykilráðuneyti og munu stýra alls átta af fjórtán fagráðuneytum. Peter Müller, einn forystumanna CDU, sagði í blaðaviðtali að það skipti ekki máli að ráðuneyti atvinnu-, skatta- og heilbrigðismála verði á höndum jafnaðarmanna. "Það sem ræður úrslitum er það sem í raun er framkvæmt," tjáði hann Die Welt. "Umbótaþörfin á þessum sviðum er óumdeild. Ef okkur tekst ekki að ná samkomulagi um víðtækar umbætur hér yrði "stóra samsteypa" tilgangslaus." Schröder sagði á verkalýðsráðstefnu í heimabæ sínum Hannover að hann myndi ekki taka sæti í nýju stjórninni. Áður staðfesti hann þó að hann myndi taka virkan þátt í stjórnarmyndunarviðræðunum. Hann sagði ekkert um hvað hann hygðist taka sér fyrir hendur er kanslaratíð hans lyki. >