Sýklamagn langt yfir hættumörkum

Sýklamagnið í vatninu í New Orleans er tíu sinnum meira en hættumörk segja til um, samkvæmt fyrstu niðurstöðum úr efnagreiningu. Sýnin voru tekin úr íbúðahverfum og talið er að talsvert meira af sýklum og eiturefnum sé í vatninu í verksmiðjuhverfum borgarinnar. Þrír hafa þegar látist af völdum sýkinga í borginni og björgunarsveitarmenn eru hvattir til að leyfa vatninu helst ekki að komast í snertingu við bert hold. Þeir sem neita að yfirgefa heimili sín verða fluttir burt með valdi á næstu dögum. Búist er við að Bush Bandaríkjaforseti fari fram á fimmtíu milljarða dollara aukafjárveitingu vegna hamfaranna í dag. Henni er fyrst og fremst ætlað að hrökkva fyrir því allra nauðsynlegasta, eins og mat og vatni, heilbrigðisþjónustu og björgunar- og hreinsunarstörfum. Sjálfur segir Bush að viðbrögð stjórnvalda við hamförunum verði skoðuð ofan í kjölinn og muni hann sjálfur fara fyrir slíkri rannsókn. Því hafna æfareiðir þingmenn Demókrata, sem segja að Bush eigi ekki að rannsaka eigin verk. Forkólfar Demókrata á Bandaríkjaþingi hafa farið fram á að óháð nefnd verði látin rannsaka málið.