Gylfi og félagar unnu United öðru sinni í vetur | Sjáðu mörkin

Swansea City vann Manchester United öðru sinni á tímabilinu þegar lærisveinar Louis van Gaal komu í heimsókn á Liberty Stadium í dag. Lokatölur urðu þær sömu og í fyrri leiknum, 2-1.

Ander Herrera kom United yfir á 28. mínútu með góðu skoti eftir vel útfærða sókn en skömmu áður hafði hann bjargað á marklínu eftir hornspyrnu Swansea.

Forystan entist hins vegar ekki lengi því tæpum tveimur mínútum síðar jafnaði S-Kóreumaðurinn Ki Su-yueng metin með skoti af stuttu færi eftir sendingu Jonjos Shelvey. Ki skoraði einnig jöfnunarmarkið í fyrri leiknum gegn United í fyrstu umferðinni í haust.

United var mun sterkari aðilinn í seinni hálfleik en það dugði ekki til því Bafétimbi Gomis skoraði sigurmark Swansea á 73. mínútu þegar hann stýrði skoti Shelveys í markið.

Gylfi Þór Sigurðsson var í byrjunarliði Swansea en fór af velli á 74. mínútu.

Swansea 0-1 Man Utd Swansea 1-1 Man Utd Swansea 2-1 Man Utd