Slys í Skorradal

Þyrla Landhelgisgæslunnar var kölluð út á níunda tímanum í gærkvöld til að sækja slasaðan mann í Skorradal. Maðurinn hafði orðið undir gröfu sem féll af kerru þegar verið var að flytja gröfuna niður af kerrunni.

Tekinn með hass í Keflavík

Tvítugur piltur var hantekinn í nótt af lögreglunni í Keflavík vegna gruns um vörslu og neyslu fíkniefna. Við leit á honum fundust tveir hassmolar, samtals um tvö  grömm. Pilturinn var látinn laus eftir yfirheyrslu.

Fimm teknir grunaðir um ölvun

Fimm voru teknir grunaðir um ölvun við akstur á Selfossi og við sumarhúsabyggðir í umdæmi lögreglunnar þar. Lögrelgan í Borgarnesi stöðvaði mann á 128 kílómetra hraða undir Hafnarfjalli um miðnætti og reyndist sá vera töluvert ölvaður. Honum var komið til síns heima eftir skýrslutöku hjá lögreglu.

Vatnavextir í Jöklu

Brúnni yfir Jöklu var lokað í gærkvöldi vegna vatnavaxta í nokkra klukkutíma af öryggisástæðum. Búist við að hún fari undir vatn næstu daga. Að sögn verkefnisstjóra Landsvirkjunar á Kárahnjúkum hafa menn ekki miklar áhyggjur af vextinum því eins og kom í ljós í fyrrasumar þoldi hún straumþunga árinnar eftir að hafa farið undir vatn.

Arna Schram nýr formaður BÍ

Arna Schram, blaðamaður á Morgunblaðinu, tók við formennsku í Blaðamannafélagi Íslands á stjórnarfundi í gær eftir að formaðurinn, Róbert Marshall, sagði sig úr stjórn í kjölfar þess að hann tók við starfi yfirmanns fréttasviðs hjá 365 ljósvakamiðlum. Arna Schram hefur verið varaformaður BÍ síðastliðin rúm tvö ár.

Strætó býður til opnunar

Strætó bs. býður íbúum höfðuborgarsvæðisins að vera við formlega opnun á nýju leiðarkerfi á Hlemmi klukkan eitt í dag. Þar verða stjórnarformaður og framkvæmdastjóri Strætós bs. sem munu kynna nýtt kerfi. Þá taka borgarstjóri og bæjarstjórar aðildarsveitarfélaga Strætós kerfið formlega í notkun.

Ókeypis skoðun á aftanívögnum

VÍS og Frumherji bjóða næstu daga ókeypis úttekt á fellihýsum, hjólhýsum, tjaldvögnum og hestakerrum til að fólk geti gengið úr skugga um að tengi- og öryggisbúnaður þeirra sé í lagi áður en lagt er upp í ferðalag um verslunarmannahelgina.

Ölvaður á 128 km hraða

Ökumaður fólksbifreiðar var stöðvaður af lögreglunni í Borgarnesi þar sem hann ók yfir leyfilegum hámarkshraða undir Hafnarfjalli í Borgarfirði skömmu eftir miðnætti í gær.

Frönskum dögum lýkur í dag

Frönskum dögum á Fáskrúðsfirði lýkur í dag en lögregla telur að um þrjú til fjögur hundruð manns hafi lagt leið sína í bæinn til að fagna með heimamönnum. Hátíðin hefur gengið stórslysalaust fyrir utan nokkur minni háttar viðvik sem lögregla rekur til ölvunar en hún hefur verið töluvert mikil og var talsverður erill hjá lögreglu.

R-listinn hangir á bláþræði

Ekkert bendir til annars en að dagar Reykjavíkurlistans séu senn taldir ef marka má viðbrögð forystumanna flokkanna þriggja sem listann skipa við ályktun Framsóknarflokksins í Reykjavík norður um framboðsmál flokksins.

Framsókn ruggar bátnum

"Það hafa verið uppi raddir um að við séum skelkaðir og að við þorum ekki að fara einir fram. Þetta eru skilaboð til hinna flokkanna um hið gagnstæða," segir Þorlákur Björnsson, formaður kjördæmisráðs Framsóknarflokksins í Reykjavíkurkjördæmi norður.

Nýtt leiðakerfi tekið í notkun

Borgarstjóri og bæjarstjórar nágrannasveitarfélaga Reykjavíkur klipptu í gær á borða til merkis um að nýtt leiðakerfi Strætó hefði tekið gildi.

Erlendir fangar kosta sitt

Kostnaður samfélagsins vegna erlendra fanga í íslenskum fangelsum eykst ár frá ári. Um fimmtán prósent þeirra fanga sem nú sitja inni eru útlendingar.

Reglur um ökuréttindi hertar

Reglur um ökuréttindi verða hertar enn frekar. Ökuskírteini afhent 19 ára unglingi gildir þar til hann verður sjötugur, þótt ekki sé sjálfgefið að hann sé fullkomlega ökuhæfur allan þann tíma.

Rjómablíða í Reykajvík

Óhætt er að fullyrða að rjómablíða hafi verið á höfuðborgarsvæðinu í gær á einum heitasta degi sumarsins hingað til. Reykvíkingar og nærsveitungar þeirra flykktust út úr húsum sínum til að njóta veðurblíðunnar.

Atvinnubílstjórar stöðva umferð

Atvinnubílstjórar ætla að loka gatnamótum Vesturlandsvegar og Suðurlandsvegar rétt fyrir verslunarmannahelgina. Lokunin verður annað hvort á fimmtudag eða föstudag en upplýsingar um nákvæmari tímasetningu ætlar hópur atvinnubílsjóra sem standa fyrir lokuninni ekki að gefa út að svo stöddu.

Bubbi ætlar í skaðabótamál

Bubbi Morthens ætlar að höfða skaðabótamál fyrir meiðyrði á hendur 365 prentmiðlum, sem gefa út tímaritið Hér og nú. "Við erum búin að senda körfugerð sem engin viðbrögð hafa komið við, þannig að næsta skrefið verður bara að stefna málinu fyrir dóm," segir Sigríður Rut Júlíusdóttir, lögfræðingur Bubba.

Nýtt leiðakerfi Strætó

Nýtt leiðakerfi Stætós bs. var tekið í notkun á Hlemmi í dag með pompi og prakt. Skiptar skoðanir eru um hvort breytingarnar hafi í för með sér að stætisvagnaferðir verði betri kostur en áður.

Afstaða ráðherra hefur ekki áhrif

Ekki er áformað samkvæmt þeim hugmyndum sem Reykjavíkurborg kynnti Háskólanum í Reykjavík að byggja innan flugvallargirðingarinnar næstu tíu til fimmtán árin. Afstaða samgönguráðherra hefur því engin áhrif á framkvæmdir fram að þeim tíma. Þetta segir Dagur B. Eggertsson, borgarfulltrúi Reykjavíkurlistans.

Enginn er eyland í R-listanum

„Það býður enginn flokkur fram Reykjavíkurlista einn og sér - það er ekki R-listi,“ segir Steinunn Valdís Óskarsdóttir borgarstjóri. Tveir menn eru skráðir fyrir Reykjavíkurlistanum í fyrirtækjaskrá - annar er framsóknarmaður og hinn er í Samfylkingunni.

Umferðarátak lögreglu borgar sig

Að minnsta kosti fjórðungur þeirra 40 milljóna sem settar voru í umferðarátak lögreglunnar hefur skilað sér til baka í ríkiskassann í formi sektargreiðslna - og það á aðeins þremur vikum.

Ökuníðingar á ofsahraða

Þrír ökuníðingar mældust á ofsahraða í gærkvöldi og í nótt og þykir mildi að ekki hlutust stórslys af háttarlagi þeirra.

Fjöldi ökumanna án skírteina

Tíu prósent ökumanna, eða 25 af þeim 250 sem lögreglan í Reykjavík stöðvaði upp úr miðnætti til að kanna ástand ökumanna, reyndust ekki hafa ökuskírteini á sér þótt þeir hefðu próf í gildi. Fimm þúsund króna sekt liggur við slíku. Þá reyndust fjórir vera ölvaðir og aðrir fjórir rétt undir mörkum, þannig að þeir urðu að skilja bíla sína eftir. Einn ökumaður var réttindalaus, eftir að hafa verið sviftur ökuréttindum.

Saddam Hússein kvartar

Saddam Hússein, fyrrum leiðtogi Íraks, kvartar sáran yfir því að fá ekki að ráðfæra sig við lögfræðinga sína í aðdraganda réttarhaldanna yfir honum. Þetta kemur fram í myndbandi sem birtist á al-arabía sjónvarpsstöðinni í gær. Saddam gagnrýndi einnig nýja ríkisstjórn Íraks, sem hann sagði handbendi Bandarískra stjórnvalda.

Æfingasvæði fyrir vélsleða

Sveitarfélagið Ölfus hefur tekið torfæruhjóla- og vélsleðamenn upp á sína arma og veitt þeim afnot af stóru æfingasvæði þar sem annað útivistarfólk á sjaldnast leið um. Nánar til tekið er svæðið norðan Litlu Kaffistofunnar og allt upp í Jóspesdal, þar sem aksturs- og æfingabrautir verða lagðar.

OR kaupir Stykkishólmsveitu

Samningar hafa tekist um kaup Orkuveitu Reykjavíkur á vatns- og hitaveitu Stykkishólmsbæjar.  Húshitunarkostnaður á veitusvæðinu mun lækka um allt að 35 prósent 1. september, samkvæmt fréttatilkynningu.

Fjármálaeftirlit ósátt við viðauka

Fjármálaeftirlitið telur að formaður og varaformaður stjórnar Sameinaða lífeyrissjóðsins hafi farið út fyrir umboð sitt þegar þeir gerðu viðauka við ráðningarsamning framkvæmdastjóra sjóðsins. Fjármálaeftirlitið gerir alvarlega athugasemd við þá ráðstöfun.

Umsækjendur orðnir 23

Umsækjendur um stöðu útvarpsstjóra eru nú orðnir 23 en Kjartan "Vídó" Ólafsson, 23 ára verslunarmaður, bættist í hópinn í morgun þegar umsókn hans barst menntamálaráðuneytinu í pósti. Enn er möguleiki á að fleiri umsóknir berist í pósti seinna í dag eða eftir helgi.

Dýra og plöntulíf í Surtsey

Á vef Náttúrfræðistofnunar er sagt frá árlegum sumarleiðangri líffræðinga stofnunarinnar í Surtsey sem farinn var 18 - 25 júli, þar sem kannað var bæði plöntu- og dýralíf á eynni. Einnig voru sett upp sjálfvirk mælitæki sem skrá munu loft- og jarðvegshita næsta árið.

Slys í Hvalvatnsfirði

Maður slasaðist alvarlega þegar hann hrapaði á annað hundrað metra í skriðum við Hvalvatnsfjörð. Björgunarsveitir frá Grenivík, Húsavík og Akureyri voru kallaðar á svæðið sem og sérþjálfaðir fjallabjörgunarmenn og er læknir og björgunarmenn komnir til mannsins en beðið er eftir þyrlu Landhelgisgæslunnar. Skyggni er slæmt þar sem töluverð þoka er á svæðinu.

Aðeins heillaóskir ennþá

"Það hefur enginn haft samband við mig af þessu óánægða fólki," segir Fríða Regína Höskuldsdóttir, nýr skólastjóri í Landakotsskóla um deilurnar sem þar hafa verið. "Enn sem komið er hef ég ekkert annað fengið en hamingjuóskir." Hún segist ekki taka þeirri gagnrýni sem komið hefur fram í fjölmiðlum persónulega.

Próflaus á 176 kílómetra hraða

Tvítugur ökuréttindalaus piltur, ók bifreið á 176 kílómetra hraða á Reykjanesbraut við Smáralind í nótt. Lögreglan í Reykjavík var látin vita og mældi hraða bifreiðarinnar skömmu síðar á Sæbraut.

Fjármálaeftirlit með athugasemdir

Fjármálaeftirlitið gerir alvarlega athugasemd við að stjórn Sameinaða Lífeyrissjóðsins hafi ekki verið kunnugt um starfslokakjör Jóhannesar Siggeirssonar fyrrum framkvæmdastjóra og fellst ekki á þá skoðun stjórnarinnar að formaður og varaformaður hafi haft umboð til að gera viðauka við samninginn. 

Ferðamaður féll í hver í Reykjadal

Um hálf fjögur leytið var tilkynnt um að erlendur ferðamaður hefði fallið í heitan hver í Reykjadal ofan við Hveragerði. Björgunarsveitir á Selfossi, Eyrabakka, og í Hveragerði voru kallaðar til að bera manninn til byggða, ef með þyrfti, en um fimm kílómetra leið er að veginum. Þær komu á staðinn rétt fyrir hálf fimm og hlúðu að manninum.

Íslendingar á Bok og Bibliotek

Ísland tekur þátt í evrópsku bókaráðstefnunni, Bok og Bibliotek, sem haldin verður í Gautaborg í haust. Rithöfundar frá 25 löndum koma að ráðstefnunni. Sjón verður meðal þeirra sem fara fyrir Íslands hönd en hann hlaut bókmenntaverðlaun Norðurlandaráðs í vetur fyrir bók sína Skugga-Baldur.

Vörubílstjórar mótmæla hækkun

Atvinnubílstjórar hóta því að valda algeru umferðaröngþveiti á mótum Suðurlandsvegar og Vesturlandsvegar fyrir verslunarmannahelgina. Þeir krefjast þess að verð á dísilolíuverði lækkað og þungaskattur afnuminn. Gatnamótunum verður lokað seinnipartinn á fimmtudag eða föstudag í næstu viku. Forsvarsmaður hópsins segir það ólíðandi hvernig atvinnubílstjórar skuli hafa látið hækkun olíugjaldsins yfir sig ganga, en ofan á hækkun olíugjaldsins þurfa þeir einnig að greiða þungaskatt.

Lögmæti sölu stofnfjár enn skoðað

Sex komu inn og fimmtán fóru úr hópi stofnfjáreigenda í Sparisjóði Hafnarfjarðar í gærkvöld. Ný stjórn styrkti stöðu sína en Fjármálaeftirlitið er enn að skoða lögmæti verslunar með stofnfé.

Árni vissi ekki betur

Pétur Blöndal, þingmaður Sjálfstæðisflokks, spáir nýrri holskeflu af uppgreiðslum hjá Íbúðalánasjóði þar sem líklegt sé að vextir lækki innan tveggja ára. Hann segir umhugsunarefni af hverju Íbúðalánasjóður hafi einungis kosið að sýna félagsmálanefnd Alþingis einn af þeim lánasamningum sem gerðir voru.

Gangstéttarakstur

Sjónarvottar héldu að það stefndi í stórslys þegar maður ók á bíl á gangstéttinni við skemmtistaðina Torvaldsen og Kaffi París við Austurvöll í gærkvöldi. Maður sem sótt hafði tvo gesti á Kaffi Austurstæti færði til útiborð og stóla með bíl sínum á gangstétt við Austurvöll sem ekki er ætluð umferð.

Strætó akreinar

Nýtt leiðakerfi strætó verður tekið í gagnið í fyrramálið og hafa strætisvagnarnir fengið þrjár nýjar sérakreinar til að aka á. Þannig er vonast til að strætó verði vinsælli ferðamáti þegar vagnarnir hafa eitthvað fram yfir almenna umferð.

Féll 150 metra í skriðum

Fertugur maður slasaðist þegar hann féll um það bil 150 metra niður skriðu um miðjan dag í gær við Hvalvatnsfjörð sem er á nesinu milli Skjálfanda og Eyjafjarðar.

Segir aðför hlægilega

Heilbrigðiseftirlitið á Akranesi kannaði í gær húsakynni fimm pólskra verkamanna sem starfa hjá fyrirtækinu Sputnikbátum og samþykkti það án athugasemda að sögn Gunnars Leifs Stefánssonar framkvæmdastjóra fyrirtækisins. "Enda er þetta fyrirtaks húsakostur," segir hann.

Smáhveli strandaði á Siglufirði

Um tveggja metra langur blettahnýðir, smáhveli af höfrungaætt, strandaði í tvígang á Siglufirði síðastliðinn miðvikudag. Í bæði skiptin losnaði hann af sjálfsdáðum en virtist vankaður eftir síðara strandið; synti í hringi og hvarf loks sjónum Siglfirðinga.

Orkuveita Stykkishólms seld

Orkuveita Reykjavíkur hefur samið við Stykkishólmsbæ um kaup á vatns- og hitaveitu bæjarins og hefur samningurinn í för með sér 35 prósenta verðlækkun á heitu vatni í bænum. Samningurinn var undirritaður í gær en Orkuveita Stykkishólms er metin á 615 milljónir króna.

Tryggingabætur öryrkja skerðast

Öryrkjar sem hafa lagt fyrir viðbótarlífeyrissparnað missa hluta af tryggingabótum sínum óski þeir eftir að fá hann útborgaðan. Þegar skatturinn hefur einnig tekið sinn toll er ávinningurinn af sparnaðinum nær enginn. Öryrki sem fréttastofan ræddi við segir þetta ekkert annað en þjófnað.