Árni vissi ekki betur

Pétur Blöndal, þingmaður Sjálfstæðisflokks, spáir nýrri holskeflu af uppgreiðslum hjá Íbúðalánasjóði þar sem líklegt sé að vextir lækki innan tveggja ára. Hann segir umhugsunarefni af hverju Íbúðalánasjóður hafi einungis kosið að sýna félagsmálanefnd Alþingis einn af þeim lánasamningum sem gerðir voru. Pétur Blöndal þingmaður Sjálfstæðisflokks furðar sig á þessari leynd þar sem Íbúðalánsjóður er opinber sjoður  og félagsleg stofnun sem á að hjálpa fólki að koma sér þaki yfir höfuðið. Hann benti einnig á að þessir samningar ættu að vera útboð. Íbúðalánsjóður ætti að bjóða út sína peninga og sjá hvaða tilboð hann fengi og að allar upplýsingar ættu að liggja fyrir. Pétur sagði jafnframt að hugsanlega væru þrjátíu samningar í gangi en að einungis einn hafi verið sýndur og á þeim samningi hefði verið búið að þurrka út öll atriði sem skipta máli, eins og ávöxtunarkröfu og annað slíkt. Pétur Blöndal segir að þegar krónan nái aftur raungengi sínu, ættu vextir að geta lækkað niður í tvö prósent. Vilji fólk skuldbreyta samkvæmt lánasamningnum við bankann sem var kynntur í gær, sitji Íbúðalánasjóður uppi með lánið og þurfi að greiða vaxtagjöldin næstu fjörutíu árin. Tveggja prósenta uppgreiðslugjald vegi ekki upp á móti nema hálfs prósents vaxtalækkun. Það sé því verið að framlengja vandann. Árni Magnússon sagði í Íslandi í dag í gær að honum fyndist ekki að Íbúðalánasjóður ætti að gera fleiri lánasamninga meðan rannsókn á lögmæti þeirra stæði yfir. Sjóðurinn sjálfur ætti hinsvegar síðasta orðið. Hann sagðí á Alþingi í vetur að Íbúðalánasjóður tæki ekki þátt í því að lána umfram hámarkslán sjóðsins. Hann segist í dag þeirrar skoðunar að lánasamningarnir séu óháðir útlánum sjóðsins þar sem þeir falli undir áhættufjárstýringu. En hann sagðist ekki hafa séð sjálfa samningana fyrr en í gær. Pétur Blöndal sagði í viðtali við Stöð 2  fyrir skemmstu að ef samningarnir væru eins og Stöð tvö hefði sagt frá og  effélagsmálaráðherra hefði vitað um samningana, þá hefði hann sagt alþingi ósatt, þegar hann fullyrti að Íbúðalánasjóður hefði ekki tekið þátt í að lána umfram hámarkslán. Pétur sagði að verið væri að fara umfram mörk Íbúðalánsjóðs og verið væri að lána án þeirra skilyrða að féð fari til íbúðakaupa. Pétur segir félagsmálaráðherra hafa sagt ósatt en líklega ekki vitað betur.