Vill ekki vera þræll Ástþórs

Natalía Wium vill skilja við Ástþór Magnússon. Ástþór krefst helmings eigna hennar. Sjálfur segist  hann ekki eiga neitt. Allt sé á nafni Friðar 2000. Líka einbýlishúsið í Vogaseli. Natalía segist hafa verið á móti forsetaframboði Ástþórs frá upphafi. Í kosningunum hafi hún þurft að leita sér hjálpar og fengið róandi lyf.

Ákvörðun tekin fyrir jól

Hæstiréttur mun taka ákvörðun fyrir jól um hvort gefið verði leyfi til að áfrýja dómi Héraðsdóms Reykjaness þar sem refsingu manns var frestað en hann beitti eiginkonu sína ofbeldi. Í málum þar sem refsingu er frestað verður ekki áfrýjað nema með leyfi Hæstaréttar.

Ók í tvígang á lögreglubíl

Kona á fertugsaldri ók tvívegis á lögreglubíl á fullri ferð og stakk síðan af síðastliðið mánudagskvöld. Lögreglumennirnir kenndu eymsla í hálsi og var lögreglubíllinn óökufær, hann var nokkuð klesstur auk þess sem fram- og hliðarlíknarbelgir í bílnum blésu út.

Í fangelsi fyrir hnífstungur

Tvítugur maður var dæmdur í fimmtán mánaða fangelsi fyrir að stinga mann fjórum sinnum fyrir framan Broadway í Ármúla í september í fyrra. Tólf mánuðir af dómnum eru skilorðsbundnir.

Farþegum um Leifsstöð fjölgar

Farþegum um Flugstöð Leifs Eiríkssonar fjölgaði um rúm tuttugu prósent í nóvember miðað við sama tíma í fyrra, úr rúmlega 89 þúsund farþegum árið 2003 í rúma 107 þúsund farþega nú.

Rannsókn lögreglu engu skilað

Rannsókn lögreglunnar á Blönduósi á því hver kveikti í atvinnuhúsnæðinu Votmúla aðfaranótt þriðjudagsins 28. september hefur enn engu skilað. Kristján Þorbjörnsson yfirlögregluþjónn segir að enginn sé grunaður þó ummerki bendi til þess að kveikt hafi verið í húsinu.  

Magakveisa ekki vegna pottréttar

Búið er að útiloka það að sýkingin sem olli því að um 200 nemendur í Menntaskólanum á Akureyri fengu heiftarlega magakveisu og niðurgang var ekki vegna pottréttar úr mötuneyti skólans. Garðar Stefánsson, bryti skólans, segist hafa fengið þetta staðfest frá trúnaðarlækni skólans.

Borgin brýtur lög í skólaeldhúsum

Formaður félags matvinnslumanna segir að samkvæmt lögum eigi aðeins faglærðir menn að meðhöndla matvæli í mötuneytum. Reykjavíkurborg fari ekki eftir því og brjóti reglugerðir Hollustuverndar og iðnaðarlög.

Hrun í rækju- og skelfiskveiðum bætt

Sveitarfélög sem hafa orðið fyrir búsifjum vegna samdráttar í veiðum fengu úthlutað mestum byggðakvóta. Þingmaður telur að kerfið letji útgerðir í því að efla sig og styrkja innan kvótakerfisins.

WHO fundar í Reykjavík

Tveggja daga aukafundur framkvæmdastjórnar Alþjóðaheilbrigðismálastofnunarinnar, WHO, hefst í Reykjavík nú á fimmtudaginn. Þetta er í fyrsta skipti sem framkvæmdastjórn stofnunarinnar heldur fund hér á landi en Davíð Á. Gunnarsson, ráðuneytisstjóri í heilbrigðis- og tryggingamálaráðuneytinu, var kjörinn formaður framkvæmdastjórnarinnar fyrr á þessu ári.

Atvinnulíf taki þátt í baráttunni

Ný reglugerð um aðgerðir gegn einelti á vinnustað verður kynnt á morgunverðarfundi miðvikudaginn 8. desember kl. 8.30 á Grand Hótel Reykjavík. Markmiðið með reglugerðinni er að stuðlað verði að forvörnum og aðgerðum gegn einelti á vinnustöðum.

Getur ekki sinnt lögbundnum verkum

Ríkisendurskoðun hefur greint þrjár meginástæður rekstrar- og fjárhagsvanda Náttúrufræðistofnunar undanfarin þrjú ár. Þar kemur fram að helstu ástæður fjárhagsvanda stofnunarinnar séu að framlög ríkisins til hennar hafi ekki fylgt verðþróun, sértekjur hennar hafi lækkað verulega. Einnig hafi laun og húsaleiga hækkað. Því nægja árlegar fjárveitingar ekki fyrir rekstri, auk þess sem stofnunin hefur safnað upp skuldum vegna rekstrarhalla.

Styddi hallarbyltingu í sósíalísku

Níu mánuðum eftir að Sigurður Ingi Jónsson, oddviti Frjálslynda flokksins í Reykjavíkurkjördæmi norður fyrir síðustu þingkosningar, sagði sig úr flokknum vegna óánægju með stefnu flokksins og varaformanninn segir hann flokkinn ekkert hafa breyst en heldur opnum þeim möguleika að snúa aftur og taka þátt í hallarbyltingu gegn forystunni.

Bílveltur vegna hálku

Nokkrir bílar ultu og nokkrir fóru útaf vegum vegna mikillar hálku víðast hvar á Suðvesturlandi í gær og fram á kvöld, en hvergi mun þó neinn hafa slasast alvarlega. Verulega hefur hlýnað í nótt og víðast er nú orðið hálkulaust á láglendi en í uppsveitum og á fjallvegum, þar sem svell hafa náð að myndast, er enn hált.

40 hafa verið yfirheyrðir

Lögreglan í Kópavogi er búin að yfirheyra um það bil 40 sköllótta eða krúnurakaða menn vegna rannsóknarinnar á brottnámi níu ára stúlku úr bænum fyrir rúmri viku, sem skilin var eftir í vonskuveðri á Mosfellsheiði. Eftir yfirheyrslurnar er enginn þeirra grunaður um verknaðinn og heldur lögregla áfram að vinna úr þeim vísbendingum sem borist hafa.

Tvö rán í Vesturbænum

Tvö rán voru framin í Vesturborignni á tólfta tímanum í gærkvöldi, en lögregla náði ræningjanum aðeins þremur mínútum eftir að hann framdi síðara ránið. Fyrst fór hann inn í söluturn við Vesturgötu og hafði þar í hótunum með kylfu þannig að afgreiðslumaðurinn lét hann hafa allt lausafé.

Földu fíkniefni innvortis

Héraðsdómur Reykjaness úrskurðaði í gær tvo útlendinga í allt að fimm daga gæsluvarðhald að kröfu Sýslumannsins á Keflavíkurflugvelli, vegna rannsóknar á fíkniefnamisferli mannana. Við komu þeirra til landsins á laugardag fundust á þeim fíkniefni, sem þeir höfðu falið innvortis, en lögregla gefur ekki upp hversu mikið eða hvort einhver Íslendingur hefur verið handtekinn í tengslum við málið.

Spá fyrir um jarðskjálfta

Heita vatnið gæti gefið vísbendingar um yfirvofandi jarðskjálfta. Rannsóknir vísindamanna við norræna eldfjallasetrið benda til þess að efnainnihald heits vatns úr borholum breytist áður en jarðskjálftar ríða yfir.

Talning stendur yfir

Talning atkvæða kennara um nýjan kjarasamning grunnskólakennara og sveitarfélaga stendur nú yfir og verða niðurstöður birtar klukkan fimm í dag. Rösklega fjögur þúsund kennarar eru á kjörskrá en ekki er gefið upp hver þáttaka í atkvæðagreiðslunni er.

Dalurinn lækkar enn

Gengi Bandaríkjadals hefur enn lækkað gagnvart krónunni í morgun. Sölugengi KB-banka var til að mynda 62,74 krónur, eða 20 aurum lægra en á föstudagseftirmiðdag. Talið er að dollarinn geti lækkað enn frekar gagnvart helstu viðmiðunargjaldmiðlum, einkum Evrunni, vegna áhyggjum manna af efnahagsþróun og skuldasöfnun ríkissjóðs í Bandaríkjunum.

Lögreglan í Reykjavík aðstoðar

Lögreglumenn frá tæknideild lögreglunnar í Reykjavík eru lögreglunni á Sauðárkróki innan handar við að rannsaka eldsupptök í íbúðarhúsi þar á laugardag, þar sem ungur maður fórst og þrjú ungmenni sluppu naumlega. Auk þess hefur lögreglan fengið sér til aðstoðar lögreglumenn úr Reykjavík til að aðstoða við skýrslutökur af vitnum, sem nú standa yfir.

Slakari en áður

Árangur íslenskra nemenda hefur heldur versnað samanborið við erlenda jafnaldra þeirra, samkvæmt fyrstu niðurstöðum alþjóðlegrar könnunar á vegum OECD. Aðeins í stærðfræði hefur Íslendingum fleygt fram. Niðurstöður PISA-rannsóknarinnar verða kynntar klukkan ellefu í kvöld, en þýska fréttatímaritið Stern greinir frá þeim engu að síður.

Gistingum fækkar á Norðurlandi

Gistinóttum á norðlenskum hótelum stórfækkaði í október í samanburði við sama mánuð í fyrra þótt gistinóttum á landinu í heild hafi fjölgað um hátt í 5 prósent. Samkvæmt samantekt Hagstofunnar voru gistinætur liðlega 1600 færri í oktober í ár en í fyrra , eða 4,130 og er það samdráttur upp á 28%.

Stofna félag utan um Straum

Tryggingamiðstöðin og Landsbankinn hafa stofnað fjárfestingafélag utan um eignir fyrirtækjanna í fjárfestingabankanum Straumi. Fjármálaeftirlitið gerði athugasemdir við að Landsbanki Íslands, þ.e.a.s. aðalstöðvarnar, og Tryggingamiðstöðin fjárfestu saman, en fyrirtækin áttu saman hluti í Straumi fjárfestingabanka.

Atlanta á sprengjuslóðir

Íslenska flugfélagið Atlanta hefur á næstu dögum pílagrímaflug og flytur farþega til Jeddah. Sjö flugvélar verða í pílagrímaflugi á vegum félagsins og fjöldi starfsfólks, þar af dágóður hluti Íslendingar. Hjá Atlanta fengust þær upplýsingar að atburðir morgunsins hefðu ekki að svo stöddu áhrif á áætlanir félagsins, en að náið væri fylgst með þróun mála í Sádi-Arabíu.

Með 300 grömm innvortis

Héraðsdómur Reykjaness úrskurðaði í gær tvo útlendinga í allt að fimm daga gæsluvarðhald að kröfu Sýslumannsins á Keflavíkurflugvelli, vegna rannsóknar á fíkniefnamisferli þeirra.

Nær 70 umsóknir

Hátt í sjötíu manns hafa sótt um sjö ný störf hjá hinu nýja sveitarfélagi Fljótsdalshéraði, samkvæmt nýju skipkuriti þess. Átján sóttu um stöðu menningar- og frístundafulltrúa, fjórtán um stöðu fjármálastjóra, tíu um stöðu verkefnis- og þróunarsjtóra, níu um stöðu umhverfisfulltrúa og jafn margir um stöðu héraðsfulltrúa. Þá sóttu átta um stöðu fræðslufulltrúa og þrír um stöðu skipulagsfulltrúa.

Rétt að snæða fisk tvisvar í viku?

Konunglega breska umhverfismengunarráðið vill fara ofan í saumana á því hvort stætt sé á þeim ráðleggingum breska menneldisráðsins, að fólk neyti fisks tvisvar í viku. Ástæðan er sú að, að mati umhverfismengunarráðsins, að þessi neysla geti endanlega gert út af við fiskistofna á heimamiðum, sem standa tæpt.

SH eignast öll bréf í Coldwater

Sölumiðstöð hraðfrystihúsanna, SH, er að ganga frá kaupum á fjórðungs hlut bresks fjárfestingarféalgs í Coldwater Seafood og eignast þar með öll bréf í Coldwater. Þá var samþykkt á hluthafafundi SH í morgun að heimila stjórn félagsins að auka hlutafé um allt að einn milljarð, með sölu nýrra hluta, meðal annars til a fjármagna nýlegar fjárfestingar í Bretlandi.

Eldur á Arnarnesi

Slökkviliðið á höfuðborgarsvæðinu var kallað að íbúðarhúsi á Arnarnesi á þriðja tímanum þar sem eldur logaði í einu herbergi. Slökkvistarf gekk vel, en stúlka, sem hafði verið í herberginu var flutt á slysadeild til rannsóknar, vegna gruns um að hún hefði fengið reykeitrun. Eldsupptök voru ókunn fyrir stundu.

Bílstjóri slasast við Axará

Ökumaður vörubíls slasaðist þegar bíllinn rann út af þjóðveginum við Axará á Fljótsdalsheiði í morgun. Hann var fyrst fluttur á Heilsugæslustöðina á Egilsstöðum og þaðan í flugvél til Akureyrar þar sem hann var lagður inn á Fjórðungssjúkrahúsið. Ökumaðurinn var að sandbera veginn til að eyða hálku, þegar slysið varð.

Ekki hækkun á Seltjarnarnesi

Bæjarstjórnin á Seltjarnarnesi ætlar ekki að hækka útsvarshlutfallið á næsta ári frá því sem það er nú, eða 12,46 prósent. Sem kunnugt er hækkar það upp i 13,03% í Reykjavík um áramótin. Þjonustugjöld á Seltjarnarnesi eiga hinsvegar að hækka í takt við verðlagsþróun.

Brutu samkeppnislög

Samkeppnisráð hefur komist að þeirri niðurstöðu að Landssíminn hafi brotið gegn ákvæðum samekppnislaga þegar hann notaði orðin frítt og ókeypis í auglýsingum á svonefndri hópáskrift fyrirtækja. Samkeppnisráð bannar Landssímanum að gefa til kynna í auglýsingum eða með örðum hætti að eitthvað sé ókeypis, ef það er það ekki afdráttarlaust.

Guðni fór ekki að upplýsingalögum

Landbúnaðarráðuneytið fór ekki að upplýsingalögum í kjölfar ráðningar héraðsdýralæknis, samkvæmt niðurstöðu Umboðsmanns Alþingis.

Hrein geggjun að auka lánin

Fólk á alls ekki að auka við lán sín, þótt freistandi kostir séu í boði hjá lánastofnunum, það er hrein geggjun, segir Guðmundur Ólafsson hagfræðingur. Hann óttast hrun húsnæðisverðs á næstu árum og varar við ákvæðum um endurskoðun vaxta, svo og gengistryggðum lánum. </font /></b />

Kennarar samþykkja

Kennarar hafa samþykkt nýjan kjarasamning. Talningu atkvæða lauk nú síðdegis og niðurstöðurnar voru þær að rúmlega helmingur samþykkti samninginn, en rúmlega 36% höfnuðu honum. rúmlega 12% skiluðu auðu. Tæplega 5 þúsund kennarar voru á kjörskrá og var kjörsókn tæp 92%.

Fleiri í brýnni þörf fyrir jólin

Fleiri virðast vera í brýnni neyð fyrir þessi jól heldur en áður, ef marka má eftirspurn eftir matvælum og fatnaði hjá úthlutunarstarfinu. Aldurshópurinn er breiðari og ungir öryrkjar eru fleiri nú heldur en áður. </font /></b />

Hvaða framkvæmdum frestað?

Ekki hefur verið ákveðið ennþá hvaða framkvæmdir verður frestað á vegaáætlun sem kynnt verður á þingi eftir áramót.

Trúir á hagvöxt til 2010

Ólíklegt er að ríkissjóður verði rekinn með 29 milljarða króna halla árin 2007 og 2008 þegar skattabreytingar ríkisstjórnarinnar koma fram af fullum þunga þó að gert sé ráð fyrir því í langtímaáætlun fjármálaráðuneytisins. Þetta er mat Einars Odds Kristjánssonar, varaformanns fjárlaganefndar. </font /></b />

Klætt sig og skætt

Fyrir 400 þúsund króna ávinning af skattabreytingum ríkisstjórnarinnar getur fjögurra manna fjölskylda skætt sig og klætt í heilt ár og keypt húsgögn og heimilisbúnað í heilt ár.

Til Kanarí á dýrasta tíma

Fimm manna fjölskylda gæti ferðast til Kanaríeyja og dvalist þar í hálfan mánuð á dýrasta tíma fyrir ávinninginn af skattabreytingum ríkisstjórnarinnar, samkvæmt léttum reiknisleik Fréttablaðsins.

Matur og drykkur í eitt ár

Matur og drykkur í heilt ár. Það er ávinningurinn sem fjögurra manna fjölskylda með eina milljón í mánaðartekjur hefur af skattabreytingunum.

Ferðir og ökutæki í ár

Fimm manna fjölskylda eyðir um 740 þúsund krónum í ferðir og flutninga á ári eða nánast sömu upphæð og fjölskyldan græðir á skattabreytingum ríkisstjórnarinnar samkvæmt einföldum útreikningum fyrir Fréttablaðið.

Gengisþróun góð fyrir bæjarsjóð

Gert er ráð fyrir 50 milljarða afgangi bæjarsjóðs Hafnarfjarðar á næsta ári. Stjórnarandstaðan segir að enn sé bæjarsjóður rekinn með tapi og hagstæð gengisþróun snarbæti annars slæma stöðu.

Samþykkt með semingi

Segja má að kennarar hafi samþykkt nýjan kjarasamning við launanefnd sveitarfélaga með semingi í allsherjaratkvæðagreiðslu. 92% kennara tóku þátt í atkvæðagreiðslunni, þar af skiluðu 12% auðu.