Kvið­dóm­endur fá enn eitt tæki­færi

Í lok gærdagsins sagði steig formaður kviðdómsins fram og sagði að einn úr tólf manna hópnum færi ekki eftir skipunum dómarans hvað varðar leiðbeiningar um sönnunarbyrði og hugtakið „hafið yfir skynsamlegan vafa“ (e. beyond reasonable doubt).

Sjá einnig: Kviðdómandi neitar að fylgja reglum um sönnunarbyrði

Það þykir benda til þess að flestir kviðdómendur vilji sýkna Clancy.

Vildi ekki hafa afskipti af kviðdómnum

William Sullivan, dómari, sendi kviðdómendur heim í gær og gaf lögmönnum Clancy og saksóknurum tækifæri til að undirbúa sig og leggja fram tillögur um framhaldið í dag. Það gerðu þau núna í dómsal, en málaferlin hófust á ný klukkan eitt að íslenskum tíma.

Í dómsalnum fóru saksóknarar fram á að kviðdómendum yrði gert að reyna að halda áfram að koma að sameiginlegri niðurstöðu. Ekki væri hægt að skipta út umræddum kviðdómenda.

Því var lögmaður Clancy ekki sammála og sagði að ef einn kviðdómandi neitaði að framfylgja lögunum að fullnustu, af persónulegum ástæðum eða skoðunum, væri réttast að vísa viðkomandi úr kviðdómnum.

Hann sagðist aldrei hafa upplifað það áður að formaður kviðdóms stigi fram og segði að einn kviðdómenda neitaði að framfylgja lögunum.

Lögmaðurinn sagði einnig að sá kviðdómandi hefði logið að dómaranum í gær. Því voru bæði dómarinn og saksóknarar ekki sammála.

Niðurstaðan var sú að Sullivan ákvað að halda óbreyttri stöðu. Hann kallaði kviðdómendur inn í sal, ítrekaði fyrir þeim reglurnar og sendi þau aftur fram til að reyna að komast að niðurstöðu.

Í janúar 2023 myrti Clancy þrjú börn sín og reyndi síðan að svipta sig lífi með því að stökkva út um glugga á annarri hæð. Hún lamaðist fyrir neðan mitti við fallið.

Lögmenn Clancy hafa ekki neitað því að hún hafi myrt börnin en segja hana hafa þjáðst af miklum geðrænum vanda vegna fæðingarþunglyndis. Hún sé með geðhvarfasýki og að þunglyndislyf sem hún fékk eftir fæðingu þriðja barnsins hafi valdið því að geðheilsa hennar versnaði til muna.

Sjá einnig: „Hún drap börnin“

Þegar hún framdi morðin sagðist hún hafa heyrt rödd sem sagði henni að bana börnunum og svo sjálfri sér. Börnin voru fimm ára, þriggja ára og átta mánaða.

Sjá einnig: Móðirin sem Bandaríkjamenn deila um

Málið gegn Clancy hefur verið mikið á milli tannanna á fólki vestanhafs. Margir sýna henni samhug og telja málið sýna skort á geðheilbrigðisþjónustu fyrir nýbakaðar mæður. Aðrir vilja að Clancy sé refsað, þar sem morðin hafi verið skipulögð.

Þrír kostir ef réttarhöldin verða ógild

Ef niðurstaða kviðdómenda er sekt, þurfa þeir allir að vera þeirrar skoðunar að saksóknarar hafi sannað að Clancy hafi bæði framið glæpinn og sé sakhæf. Dómarinn hefur áður sagt kviðdómendum að Clancy væri ekki sakhæf ef hún hefði átt við geðrænan vanda að stríða sem hefði komið í veg fyrir að hún hefði stjórn á aðgerðum sínum eða skyldi þær að fullu.

Komist kviðdómendur að þeirri niðurstöðu að Clancy sé sek, verða þeir að velja á milli þess að hún hafi framið morð eða manndráp. Morð felur í sér lífstíðarfangelsisdóm en verði niðurstaðan manndráp gæti hún einhvern tímann losnað úr fangelsi.

Ef kviðdómendur segja að Clancy sé ekki sakhæf verður hún vistuð á geðsjúkrahúsi ríkisins.

Enn einn möguleikinn í stöðunni er að kviðdómendur komist ekki að sameiginlegri niðurstöðu, eins og þeir hafa verið í vandræðum með.

Fari svo, verður dómarinn að vísa málinu frá. Þá verður það saksóknara að ákveða hvort þeir vilji gera aðra tilraun í dómsal, fella niður ákærurnar gegn Clancy eða gera einhvers konar samkomulag við lögmenn hennar.