Sjáðu Stjörnuna stimpla sig í titilslag og Hamlett koma Fram af botninum

Stjarnan hefur ekki tapað í sjö leikjum í röð, unnið fimm þeirra, og er nú í 3. sæti með 21 stig, tveimur stigum á eftir toppliði FH sem mætir Grindavík/Njarðvík annað kvöld.

Stjörnukonur unnu Þór/KA 3-2 í gærkvöld þar sem Fanney Lísa Jóhannesdóttir, Snædís María Jörundsdóttir og Hulda Hrund Arnarsdóttir skoruðu mörk þeirra. Bríet Jóhannsdóttir jafnaði metin í fyrri hálfleik fyrir gestina, í 1-1, og Erin Flurey minnkaði muninn úr víti í lokin.

Í Laugardalnum fylgdu Framkonur eftir sigrinum óvænta gegn Breiðabliki með því að vinna Þróttara, 1-0. Þróttur hefur því tapað þremur leikjum í röð og mistekist að skora í þremur af síðustu fjórum deildarleikjum.

Taylor Hamlett skoraði sigurmark Fram í gær, í upphafi seinni hálfleiks, og er nú markahæst í deildinni ásamt Ídu Marín Hermannsdóttur með átta mörk.