Þór/KA - Stjarnan 2-2 | Sterk endur­koma hjá norðankonum

Þór/KA og Stjarnan gerðu 2-2 jafntefli í þriðju umferð Bestu deildar kvenna á VÍS-vellinum fyrir norðan í dag. Gestirnir leiddu með tveimur mörkum í hálfleik en norðankonur komu til baka og náðu inn jöfnunarmarki í lokin.

Stjarnan mun sterkari í fyrri hálfleik

Leikurinn var aðeins níu mínútna gamall þegar fyrsta markið kom. Andrea Mist Pálsdóttir tók þá hornspyrnu frá vinstri og setti boltann inn að markinu og vildi ekki betur til en að boltinn endaði í fjærhorninu án viðkomu nokkurs leikmanns, fyrir utan Allesöndru Doherty í markinu sem sló boltann inn, og gestirnir komnir í forystu.

Stjarnan hélt meira í boltann og náði nokkrum ágætis spilköflum sín á milli á meðan norðankonur virtust ekki alveg nægilega samstilltar og komu þeirra helstu ógnir úr skyndisóknum og föstum leikatriðum.

Það dró aftur til tíðinda eftir 40 mínútna leik en þá skoraði Andrea Mist aftur mark beint úr hornspyrnu. Boltinn var settur hátt yfir á fjærstöngina þar sem Allesandra rétt náði að slá til boltans sem dugði ekki til og hann endaði í netinu.

Hreint ótrúlegt að sami leikmaður skori tvö mörk beint úr hornspyrnu og það í sama hálfleiknum og verð ég að setja stórt spurningamerki við Allesöndru í markinu.

Gestirnir 2-0 yfir í hálfleik.

Tækifæri til að gera út af við leikinn 

Stjörnukonur fengu tækifæri til að gera nánast út um leikinn eftir aðeins þrjár mínútur í síðari hálfleik en þá komst Snædís María Jörundsdóttir í gott færi eftir stungusendingu frá Birnu Jóhannsdóttur og Allesandra varði frá henni en boltinn hrökk aftur til Snædísar sem var svo með tómt mark fyrir framan sig en skaut á ótrúlegan hátt framhjá.

Það var svo allt annað að sjá Þór/KA liðið eftir þetta færi og spil þeirra varð miklu hraðar og ákefðin í bæði vörn og sókn mun betri og þurfti gestirnir því að hafa meira fyrir hlutunum en áður.

Amalía minnkar muninn fyrir Þór/KA

Amalía Árnadóttir minnkaði muninn á 75. mínútu með góðu skallamarki eftir fyrirgjöf frá varamanninum Birgittu Rún Finnbogadóttur sem átti frábært hlaup inn á teig áður en fyrirgjöfin kom.

Margrét jafnaði og fékk færi til að vinna 

Það var svo á fyrstu mínútu uppbótartíma sem að Margrét Árnadóttir, systir Amalíu, jafnaði leikinn fyrir heimakonur þegar hún setti boltann laglega í markið á nærstönginni eftir hornspyrnu frá Elísu Bríeti Björnsdóttur

Það mátti svo engu muna að Margrét hefði stolið sigrinum á þriðju mínútu uppbótartímans þegar hún fékk boltann óvölduð rétt fyrir utan teig en skot hennar fór rétt framhjá.

Liðin skildu því jöfn eftir mikla dramatík í lokin.

Atvik leiksins

Jöfnunarmark Þór/KA sem Margrét skorar í lokin. Frábærlega útfærð hornspyrna sem skilar þessu stigi.

Stjörnur og skúrkar

Þær systur, Margrét og Amalía Árnadætur reynast hetjurnar Þór/KA megin þar sem þær skora mörkin tvö og átti Margrét sérstaklega góðan síðari hálfleik.

Birgitta Rún Finnbogadóttir átti öfluga innkomu af bekknum, mikill kraftur og áræðni í henni og lagði hún upp fyrra markið.

Mér finnst Allesandra Doherty þurfa gera miklu betur í markinu en auk þess að fá á sig tvö mörk beint úr hornspyrnum var hún ekki traustvekjandi í öðrum aðgerðum í dag.

Andrea Mist skoraði tvö mörk í dag og átti góðan leik á miðjunni og þá átti Snædís María góða innkomu af bekknum í fyrri hálfleik.

Dómarinn

Bergvin Fannar Gunnarsson átti prýðisleik á flautunni í dag en ekki mikið um stór atvik og vafaatriði sem hann þurfti að eiga við.

Aðstoðarmenn hans sitthvoru megin við völlinn, Birkir Örn Pétursson og Ágúst Örn Víðisson, áttu góðan dag og fær Ágúst sérstakt hrós fyrir hans nákvæmni.

Stemning og umgjörð

Stemningin var lítil og aðeins 86 manns sem mættu á leikinn í dag sem telst ekki gott. Þó verður að taka inn í myndina að leikurinn var kl. 17:00 á virkum degi og mjög kalt í veðri en mætingin má samt vera mun betri.

Umgjörðin góð á VÍS-vellinum og hamborgarasalan á sínum stað á pallinum í Hamri.