Ný Ölfusárbrú farin að taka á sig mynd

Verkefnið gengur vel að sögn Höskuldar Tryggvasonar, verkefnastjóra hjá Vegagerðinni, og ekkert óvænt komið upp á fram að þessu. Verktakinn ÞG Verk vinni nú að uppsteypu á undirstöðum fyrir stöpla nýju brúarinnar, bæði á árbökkunum og út í eynni sem liggur í miðri Ölfusá.

Höskuldur segir um að ræða mjög umfangsmikla framkvæmd og með stærri verkefnum í vegagerð sem ráðist hefur verið í hér á landi.

Brúin verði 330 metra löng og um fjörutíu starfsmenn vinni nú jafnan á svæðinu. „En þeim fer fjölgandi eftir því sem líður meira fram á vorið,“ sagði Höskuldur í kvöldfréttum Sýnar en hann var þá staddur á nýrri bráðabirgðabrú sem búið er að reisa út í eyjuna. Verður hún notuð meðan á framkvæmdum stendur.

Nýja brúin komi til með að breyta miklu fyrir íbúa

Íbúar á Selfossi hafa lengi kvartað undan umferðaröngþveiti á gömlu Ölfusárbrúnni á álagstímum. Höskuldur segir nýju brúnna koma til með að breyta mjög miklu enda muni hún leiða umferðina annað.

„Öll þungaumferð mun færast upp á nýju brúnna og svo líka mikið af annarri umferð líka, sérstaklega þeir sem fara hér beint í gegn.“

Hluti af framkvæmdunum sé að gera vegbrú í nýjum mislægum vegamótum austan við Selfoss. Eru þær framkvæmdir í fullum gangi sem og vegagerð sitt hvorum megin við brúnna. Því sé ljóst að mikið verði um að vera á svæðinu næstu misseri og ár.