Hvatt til að hvíla einkabílinn vegna mengunar

Svifrykið kemur vegna umferðar í borginni en þar sem götur eru þurrar eru gildi einnig há á stöðvum fjær stórum umferðaræðum. Á hádegi mældist svifryk upp á 171,4 við Grensásveg en sólarhringsheilsuverndarmörkin eru fimmtíu míkrógrömm á rúmmetra.

Stefnt er á að rykbinda í nótt til að draga úr uppþyrlun ryks. Gert er ráð fyrir svipuðum veðuraðstæðum um helgina en vonir standa til að rykbinding muni draga úr svifryksmengun.

„Þau sem eru viðkvæm fyrir í öndunarfærum, aldraðir og börn ættu að forðast útivist í lengri tíma og takmarka áreynslu,“ segir í tilkynningu frá Reykjavíkurborg.

Íbúar eru hvattir til að draga úr notkun einkabílsins og geyma ferðir sem eru ekki aðkallandi. Þeir ættu frekar að nýta sér almenningssamgöngur, sameinast í bíla eða nota aðra vistvæna samgöngumáta. Einnig er skorað á fyrirtæki að hvetja starfsfólk til að vinna fjarvinnu á svifryksdögum sé þess kostur.

Hægt er að fylgjast með loftgæðum á öllu landinu á loftgæði.is.