Úti­loka ekki að beita hernum í Græn­landi

Í svari Hvíta hússins við fyrirspurn Reuters segir að Trump telji kaup á Grænlandi forgangsmál fyrir þjóðaröryggi Bandaríkjanna. Landið sé einnig nauðsynlegt til að „fæla frá andstæðinga“ á norðurslóðum.

„Forsetinn og teymið hans ræða ýmsa möguleika til að ná þessu mikilvæga markmiði og að sjálfsögðu er notkun bandaríska hersins, undir stjórn yfirhershöfðingjans, alltaf valkostur,“ segir í svarinu frá Karoline Leavitt, talsmanni Hvíta hússins.

Í umfjöllun The Wall Street Journal er haft eftir Marco Rubio, utanríkisráðherra Bandaríkjanna, sem segir markmiðið vera að kaupa landið af Dönum. Ítrekaðar hótanir og yfirlýsingar forsetans um yfirráð hans í Grænlandi þýði ekki endilega að landið verði tekið yfir með herafla.

Trump viðraði fyrst hugmyndir sínar um að kaupa Grænland á fyrsta kjörtímabili sínu árið 2019. Í innsetningarræðu sinni fyrir ári síðan minntist hann á hversu mikilvægt Grænland væri fyrir öryggi Bandaríkjamanna. Undanfarna daga, í kjölfar innrásar Bandaríkjanna í Venesúela, hefur forsetinn ítrekað minnst á landið og mikilvægi þess.

Danir og Grænlendingar hafa hvað eftir annað sagt að Grænland sé ekki til sölu og að enginn áhugi sé á því að afhenda Bandaríkjamönnum landið. Fyrr í kvöld fundaði utanríkismálanefnd Danmerkur og ákvað að óska eftir fundi með Rubio.