„Fara þarf í raun­veru­legar að­gerðir“

Trausti Hjálmarsson, formaður Bændasamtakanna var nýlega með fundarherferð um landið þar sem hann og nokkrir starfsmenn samtakanna funduðu með bænum um málefni landbúnaðarins.

Loftlagsmálin voru ofarlega á baugi  hjá Trausta.

„Og breytingin, sem hefur orðið á allri umræðu við stjórnvöld, þá á ég sérstaklega við Jóhann Pál, umhverfis- og loftlagsráðherra að fyrir ekki mörgum árum snerist öll umræða um loftslagsmálin um skatta og landbúnað. Í dag erum við hins vegar í samtali við þennan ráðherra, ágæta ráðherra, sem er hinn uppáhalds ráðherrann okkar, að fá fjármagn, að það verði bara farið í eins og hann segir sjálfur, raunverulegar aðgerðir, sem skila raunverulegum árangri,” sagði Trausti á fundi á Flúðum en hér vísar hann í ylræktarbændur, sem rækta grænmeti í gróðurhúsum sínum.

„Hann tók nú fyrsta skrefið í því í vetur þegar hann veitti fjárfestingastuðning í ylræktina til þess að draga úr orkukostnaði og þetta eru jákvæð skref. Þetta eru kannski ekkert endilega stærstu skrefin í upphafi en það skiptir máli að fá gott veður og halda áfram að vinna og stærsta atriðið í þessu er að geta verið á þeim stað að ráðuneyti, séu ekki að taka ákvörðun um starfsskilyrði landbúnaðarins án okkar aðkomu,” bætti Trausti við í ræðu sinni.