„Getum eyðilagt drauma Úkraínu á morgun“

Ingvi Þór Sæmundsson skrifar 9. október 2025 13:23

Arnar Gunnlaugsson stýrir íslenska landsliðinu í annað sinn á heimavelli á morgun. vísir/anton

Arnar Gunnlaugsson segir að íslenska karlalandsliðið í fótbolta komi sér í vænlega stöðu í D-riðli undankeppni HM 2026 með sigri á Úkraínu annað kvöld.

Ísland er með þrjú stig í 2. sæti D-riðils undankeppninnar, tveimur stigum á undan Úkraínu sem er í 3. sætinu. Frakkland er á toppi riðilsins með sex stig. Efsta liðið fer beint inn á HM en liðið í 2. sæti fer í umspil.

Á blaðamannafundi í dag sagði Arnar að baráttan um 2. sæti riðilsins standi á milli Íslendinga og Úkraínumanna og að sigur í leiknum annað kvöld komi okkar mönnum í bílstjórasætið í þeirri baráttu.

„Ef við vinnum á morgun erum við komnir í mjög vænlega stöðu, mjög góða stöðu gagnvart Úkraínu. Ég held að allir geti séð að baráttan um 2. sætið er á milli okkar og Úkraínu. Þótt við berum virðingu fyrir Aserbaísjan eru þeir held ég ekki nógu sterkir til að blanda sér í þá baráttu. Þannig við getum eyðilagt drauma Úkraínu á morgun,“ sagði Arnar.

„Jafntefli er svo sem ekkert slæmt fyrir okkur og heldur ekki Úkraínu því þeir eiga heimaleikinn gegn okkur eftir. Ef við töpum er allt opið en markmið okkar er skýrt. Við ætlum að vinna á morgun. Það er ekkert flóknara en það og við ætlum leggja allt í sölurnar til að það takist.“

Arnar segir að allir leikmennirnir í íslenska hópnum séu klárir í slaginn fyrir morgundaginn og enginn glími við meiðsli.

Leikur Íslands og Úkraínu hefst klukkan 18:45 annað kvöld og verður sýndur í opinni dagskrá á Sýn Sport.

Landslið karla í fótbolta HM 2026 í fótbolta

Tengdar fréttir

„Ekki alltaf hægt að tala vel um mann“

Aron Einar Gunnarsson segir slæmt umtal undanfarið ekki bíta og telur það jafnvel jákvætt að gagnrýnisraddir heyrist þegar hann er valinn í landsliðshóp.

9. október 2025 09:32

„Staða mín er svolítið erfið“

Þórir Jóhann Helgason segist hungraður í að fá að spila mínútur, bæði með íslenska landsliðinu og liði sínu Lecce á Ítalíu. Framundan eru tveir risaleikir hjá Íslandi, gegn Úkraínu á föstudag og Frakklandi á mánudag, í undankeppni HM í fótbolta.

9. október 2025 07:03

Ísak lofar að hlaupa mest: „Mjög gaman að sjá fólkið bakka okkur upp“

„Það er mjög gaman að sjá að fólkið er að bakka okkur upp, og að það sé uppselt á báða leikina. Það er mjög spennandi,“ segir Ísak Bergmann Jóhannesson. Hann ætlar að hlaupa manna mest á Laugardalsvelli á föstudaginn, í leiknum mikilvæga við Úkraínu í undankeppni HM í fótbolta.

8. október 2025 22:02