Hrotta­legu of­beldi lýst í á­kæru á hendur Stefáni, Lúkasi og Matthíasi

Mennirnir þrír eru einnig ákærðir fyrir frelsissviptingu, rán og fjárkúgun. Auk þeirra eru karlmaður og kona ákærð í málinu fyrir peningaþvætti og hlutdeild í frelsissviptingu og ráni. Hvorugt þeirra hefur náð tvítugsaldri.

Í ákærunni, sem Ríkisútvarpið og DV hafa undir höndum, segir að Stefán og Lúkas Geir hafi, með aðstoð konunnar, narrað Hjörleif Hauk Guðmundsson, 65 ára, af heimili hans í Þorlákshöfn og ekið honum að Hellisheiðarvirkjun. Á leiðinni hafi þeir beitt hann margvíslegu ofbeldi. Þeir hafi til að mynda brotið í honum fimm tennur, sett poka yfir höfuð hans og reynt að fá út úr honum aðgangsorð að bankareikningum hans.

Beittu áhaldi í iðnaðarhúsnæði á Kjalarnesi

Þá segir að mennirnir hafi beðið Matthías Björn að hitta þá í iðnaðarhúsnæði á Kjalarnesi. Þar hafi þeir beitt manninn frekara ofbeldi, með hnefahöggum, spörkum og ótilgreindu áhaldi. Þeir hafi áfram reynt að fá aðgang að reikningum Hjörleifs.

Því næst hafi hópurinn farið með Hjörleif að leiksvæði í Gufunesi, þar sem ofbeldið hélt áfram. Hjörleifur hafi meðal annars verið dreginn eftir göngustíg.

Þar hafi þeim tekist ætlunarverk sitt og millifært þrjár milljónir króna af reikningi Hjörleifs inn á reikning fjórða mannsins, sem ákærður er fyrir peningaþvætti. Sá var ekki á svæðinu en millifærði peningana um hæl inn á reikning Matthíasar Björns.

Skilinn eftir helsærður og bjargarlaus

Eftir að hafa náð fjármunum af Hjörleifi hafi hópurinn skilið hann eftir í Gufunesi helsærðan og bjargarlausan. Þá var klukkan að nálgast þrjú að morgni. Þar gengu vegfarendur fram á Hjörleif um klukkan 07, þar sem hann lá illa leikinn.

Hann var fluttur á spítala en lést þar af sárum sínum skömmu síðar.

Áralangur brotaferill og tengsl við Bankastrætis club-málið

Stefán Blackburn, 34 ára, hefur hlotið nokkra dóma fyrir ofbeldisbrot en þar vakti mesta athygli Stokkseyrarmálið svokallaða. Þar var hann dæmdur í sex ára fangelsi en málið snerist um frelsissviptingu og líkamlegt ofbeldi gagnvart karlmanni sem numinn var á brott.

Lúkas Geir, sem er 21 árs, hefur hlotið sex mánaða dóm fyrir sérstaklega hættulega líkamsárás sem hann framdi aðeins átján ára. Tekið var tillit til ungs aldurs hans við ákvörðun refsingar. Þá var Lúkas Geir á meðal brotaþola í Bankastræti Club málinu svokallaða þar sem hópur grímuklæddra karlmanna réðst inn á samnefndan skemmtistað í miðborg Reykjavíkur með hnífa á lofti. Hann lýsti atvikinu í viðtali við FM957.

Matthías Björn, sem er aðeins nítján ára, hefur ekki hlotið refsidóm, eftir því sem Vísir kemst næst.