Barcelona með níu fingur á titlinum

Barcelona vann magnaðan 4-3 sigur á Real Madríd eftir að lenda 0-2 undir þegar liðin mættust í La Liga, efstu deild spænska fótboltans. Með sigrinum eru Börsungar komnir með níu fingur á Spánarmeistaratitilinn sem Real vann á síðustu leiktíð.

Fyrir leik var ljóst að gestirnir frá Madríd þyrftu að vinna til að eygja möguleika á að verja titil sinn. Barcelona hafði einnig haft betur í framlengdum leik þegar liðin mættust í úrslitum spænsku bikarkeppninnar sem og Börsungar unnu fyrri deildarleik liðanna 4-0. Það var því úr nægu að velja til að hvetja Madríd til dáða og byrjaði liðið frábærlega.

Kylian Mbappé kom Real yfir úr vítaspyrnu strax á 5. mínútu. Rétt rúmum tíu mínútum síðar tvöfaldaði Mbappé forystuna eftir undirbúning Vinícius Júnior og gestirnir í sjöunda himni. Sú gleði entist þó ekki lengi og minnkaði heimaliðið muninn aðeins fimm mínútum síðar.

Eric Garcia skoraði þá eftir sendingu Ferrán Torres en sá síðarnefndi átti heldur betur eftir að setja mark sitt á leikinn. Torres lagði einnig upp jöfnunarmark Börsunga sem hinn gríðarlega efnilegi Lamine Yamal skoraði á 32. mínútu.

Það mark sló gestina rækilega út af laginu og á 34. mínútu hafði Raphinha komið Barcelona í 3-2 eftir undirbúning frá Pedri. Raphinha bætti svo við öðru marki sínu og fjórða marki Börsunga á lokamínútu fyrri hálfleiks. Aftur var það Torres sem lagði upp.

Mbappé fullkomnaði þrennu sína þegar 20 mínútur lifðu leiks en nær komust gestirnir ekki og Barcelona vann frækinn 4-3 sigur. Raunar skoruðu heimamenn fimmta markið í uppbótartíma en markið var dæmt af þar sem leikmaður Börsunga handlék knöttinn í aðdragandanum.

Sigurinn fer langleiðina með að tryggja Barcelona spænska meistaratitilinn enda munurinn á liðunum nú sjö stig þegar aðeins níu eru eftir í pottinum.