Aftur hópuppsögn hjá Man. Utd

United hefur ekki aðeins verið að tapa innan vallar, líkt og staða liðsins í 15. sæti úrvalsdeildarinnar gefur til kynna, því fjárhagslegur rekstur félagsins hefur verið í sama takti.

Félagið tilkynnti í dag áfram yrði ráðist í umfangsmiklar aðgerðir til þess að snúa við rekstrinum og að liður í því væri fækkun starfa um um það bil 150-200 stöðugildi.

Þessar uppsagnir bætast við 250 manna hópuppsögn síðasta sumar.

„Við höfum tapað peningum á hverju ári síðustu fimm ár í röð. Svona getur þetta ekki haldið áfram,“ segir Omar Berrada, framkvæmdastjóri United, í tilkynningu á vef félagsins.

Félagið hefur staðið í umfangsmiklum aðhaldsaðgerðum frá því að breski auðkýfingurinn og Íslandsvinurinn Jim Ratcliffe eignaðist 25 prósenta hlut í félaginu og tók yfir knattspyrnurekstur þess, í von um bætt gengi innan vallar sem ekki hefur skilað sér.