Erlent

Af­salta sjó til drykkjar í þurrki í Barcelona

Kjartan Kjartansson skrifar
Viðvarandi þurrkur er í Katalóníu og íhuguðu héraðsyfirvöld meðal annars að flytja inn drykkjarvatn með bátum.
Viðvarandi þurrkur er í Katalóníu og íhuguðu héraðsyfirvöld meðal annars að flytja inn drykkjarvatn með bátum. AP/Emilio Morenatti

Yfirvöld í Katalóníu á Spáni ætla að koma upp fljótandi afsöltunarstöð til þess að tryggja borgarbúum í Barcelona drykkjarvatn í langvarandi þurrki sem geisar þar. Borgin reiðir sig nú þegar á stærstu afsöltunarstöð Evrópu til þess að bæta upp fyrir minnkandi úrkomu.

Fljótandi afsöltunarstöðin verður tekin í notkun í október ef áform héraðsstjórnarinnar ganga eftir. Hún á að framleiða um sex prósent af vatnsþörf borgarinnar. Um fjórðungur drykkjarvatnsins kemur frá varanlegri afsöltunarstöð.

Úrkoma hefur verið undir meðaltali í Katalóníu undanfarin þrjú ár sem hefur leitt til sögulegs þurrks sem ágerist vegna hnattrænnar hlýnunar af völdum manna. Vatnsból sem sex milljónir manna í miðri og norðanverðri Katalóníu, þar á meðal í Barcelona, reiða sig á, standa nú í um átján prósentum af getu sinni, að sögn AP-fréttastofunnar.

Takmarkanir á vatnsnotkun hefur verið í gildi frá því að neyðarástandi var lýst yfir í febrúar. Einstaklingar megar mest nota tvö hundruð lítra á dag. David Mascort, yfirmaður umhverfismála í Katalóníu, segir að nýja afsöltunarstöðin eigi að koma í veg fyrir að grípa þurfi til strangari takmarkana í haust.

Landbúnaður og iðnaður hefur þurft að taka á sig töluverða skerðingu. Þannig þurfa ræktendur nytjajurta að draga úr vatnsnotkun sinni um áttatíu prósent, eigendur hjarðdýra um helming og iðnaður um fjórðung.

Spánn Loftslagsmál Tækni
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið