Eldur kviknaði hjá Geymslu­­svæðinu

Eldurinn logaði við atvinnuhúsnæði Geymslusvæðisins ehf. við Kapelluhraun, skammt frá álveri Rio Tinto í Straumsvík. Mbl.is greindi fyrst frá.

„Þetta var bara eitthvað rusl sem hafði verið kveikt í sennilega en það kom góður reykur af þessu og sást vel yfir Hafnarfirði,“ segir Gunnlaugur Jónsson, varðstjóri hjá slökkviliði höfuðborgarsvæðisins, í samtali við fréttastofu. Eldurinn hafi sem betur fer ekki verið nálægt neinu sem hann gat borist í. 

Allar stöðvar voru sendar á vettvang þegar tilkynning barst en öllum snúið við nema einni þegar fyrsti bíll kom á staðinn og ljóst var um umfangið. Greiðlega gekk að slökkva eldinn og hefur helgin almennt verið fremur róleg hjá slökkviliðinu.

„Það hefur verið stórslysalaus helgin hjá okkur yfirhöfuð en fullt af svona smáverkefnum með umferðarslysum og minniháttar árekstrum eitthvað,“ segir Gunnlaugur. Lítið hafi verið um eldsvoða.

„Við höfum sloppið með það.“