Byrjaðir að nota klasasprengjur

Heimildarmenn Washington Post í Úkraínu, segja að til að byrja með séu sprengjurnar notaðar til að veikja umfangsmiklar varnir Rússa í suðri en Úkraínumenn hafa átt erfitt með að sækja fram vegna þessara varna.

Klasasprengjur eru mjög umdeildar og hafa verið bannaðar í 123 ríkjum víða um heim.

Áður en klasasprengjur lenda, opnast þær og dreifa fjölda minni sprengja. Minni sprengjurnar eru á stærð við handsprengju og þær geta dreifst yfir stórt svæði. Eitt af því sem gerir vopnin svo umdeild er að hluti minni sprengjanna springur ekki.

Börn og aðrir hafa orðið fyrir miklum meiðslum eða dauða vegna þessara sprengja mörgum mánuðum eða árum eftir að þeim er varpað. Bandaríkin, Úkraína og Rússland hafa ekki gert slíkar sprengjur ólöglegar en Úkraínumenn segjast ætla að reyna að takmarka þau áhrif sem sprengjurnar gætu haft á óbreytta borgara.

Sjá einnig: Verja klasasprengjusendingar til Úkraínu

Úkraínumenn hafa lengi beðið um þessi vopn frá Bandaríkjunum, sem sitja á umfangsmiklum birgðum af þeim. Þeim er skotið með hefðbundnum stórskotaliðsvopnum sem Úkraínumenn hafa þegar fengið frá bakhjörlum sínum.

Auk þess að þeir noti þær í átökunum í suðurhluta landsins, þar sem Úkraínumenn reyna að brjóta sér leið í gegnum umfangsmiklar varnir Rússa, er einnig talið að þær verði notaðar við rústir borgarinnar Bakhmut. Þar hafa Úkraínumenn náð nokkrum árangri á útjöðrum borgarinnar og segjast þeir færast nær því að umkringja rússneska hermenn þar.

Gífurlega umfangsmikil jarðsprengjusvæði hafa reynst úkraínskum hermönnum mjög erfið. Þyrlur og eldflaugar sem hannaðar eru til að granda bryn- og skriðdrekum hafa einnig komið mjög niður á sókn Úkraínumanna.

Því hafa Úkraínumenn breytt um stefnu og ætla þeir að reyna að vinna hægt og rólega að því að veikja varnir Rússa með stórskotaliðsárásum á skotgrafir þeirra, og eld- og stýriflaugaárásum á birgðanet Rússa og stjórnstöðvar. Með því að nota klasasprengjur geta Úkraínumenn haldið þrýstingi á Rússa mun lengur en þeir gætu án þeirra.

Reyna að auka sjálfbærni Úkraínumanna

Úkraínumenn hafa fengið mikið magn bryn- og skriðdreka frá bakhjörlum sínum. Eðli málsins samkvæmt hafa Rússar grandað eða skemmt marga af þeim. Það hefur reynst flókið fyrir úkraníska hermenn að halda utan um viðhald á þessum farartækjum, sem koma frá mörgum ríkjum.

Þar af leiðandi þurfa Úkraínumenn að eiga margskonar varahluti og viðgerðarbæklingar eru ekki endilega til á úkraínsku, auk annarra vandamála. 

Skemmist bryn- og skriðdrekar mikið hafa Úkraínumenn þurft að flytja þá til Póllands, Tékklands eða jafnvel til Þýskalands. Þá hafa Úkraínumenn einnig kvartað yfir því að hergögn sem þeir hafa fengið frá bakhjörlum sínum hafi ekki verið í nothæfu ástandi þegar þau berast til Úkraínu.

Aukin áhersla hefur verið sett í reyna að auka sjálfbærni Úkraínumanna og auðvelda þeim þessar viðgerðir svo hægt sé að koma skemmdum bryn- og skriðdrekum aftur á víglínurnar eins fljótt og auðið er. Pólverjar, Bandaríkjamenn og Bretar leiða 22 þjóða hóp sem reynir að halda utan um viðhald úkraínskra hergagna. Það hefur þó reynst erfitt, samkvæmt frétt Politico.

Pólverjar og Þjóðverjar ætluðu í sameiningu að reisa viðgerðarstöð fyrir Leopard skriðdreka í Póllandi en viðræður þar að lútandi féllu niður vegna deilna um kostnað. Á meðan sitja skemmdir skriðdrekar fastir í Póllandi en nú stendur til að reyna að gera við þá í Þýskalandi og í Litháen, eftir einhvern tíma.

Bandaríkjamenn hafa samkvæmt Politico þýtt rúmlega 700 viðgerðarbæklinga og leitað til vopnaframleiðenda eftir gögnum og upplýsingum um vopn og hergögn. Þá er einnig unnið að því að auka hergagnaframleiðslu á Vesturlöndum og þá sérstaklega á skotfærum fyrir stórskotalið.