Bakkaði bát niður Reykja­nes­brautina

Árni Frið­leifs­son, aðal­varð­stjóri um­ferðar­deildar lög­reglunnar á höfuð­borgar­svæðinu segir í sam­tali við Vísi að þetta sé ekki í fyrsta sinn sem öku­menn flutninga­bíla klikki á því að kynna sér reglur um breiddar-og hæðar­mörk í ís­lensku gatna­kerfi.

Flutninga­bíllinn hafði valdið tölu­verðri töf á um­ferð þegar lög­regla bar að garði. Þó nokkurn tíma tók bílinn að bakka niður að Lindum í Kópa­vogi, þar sem hann tók beygu til hægri og fór sína leið upp í Kóra­hverfi.

„Sem betur fer hringja menn oft í okkur og við reynum að að­stoða og liðka til eins og við getum,“ segir Árni sem minnir á að það sé al­var­legt mál þegar öku­menn kynni sér ekki þessar reglur. Hann hvetur öku­menn flutninga­bíla til þess að kynna sér þær vel, enda um að ræða lög. 

„Auð­vitað getur þetta skapað hættu en þó aðal­lega truflanir á um­ferð og það eru dæmi þess að menn hafi fengið kæru vegna þessa. Það eru nokkur ár til dæmis síðan að flutninga­bíll með gler­gám keyrði á brú á Höfða­bakka með til­heyrandi gler­brotum og töfum á um­ferð.“