Slökktu fjölda gróður­elda síðast­liðinn sólar­hring

Að sögn varðstjóra hjá slökkviliðinu var um minniháttar sinubruna að ræða sem gekk vel að slökkva. Þeir hafi kviknað við Landspítalann við Hringbraut, við Hlíðarenda og í Vatnsmýrinni. 

Þá segir hann að áfram verði hætta á gróðureldum vegna mikillar þurrkatíðar á höfuðborgarsvæðinu en að henni fari senn að ljúka. „Við bíðum bara eftir rigningunni.“

Í færslu á Facebooksíðu slökkviliðsins segir að erilsömum sjúkraflutningasólarhringi sé lokið. Farið hafi verið í 135 sjúkraflutninga og þar af 54 forgangsflutninga. 

„Spurning hvort góða veðrið í gær hafi kynnt undir djammpúkann hjá fólki því nóttin tengdist svolítið skemmtanalífinu. En sem betur fer voru það meira og minna minniháttar útköll,“ segir í færslunni.

Að sögn varðstjóra var farið í 25 sjúkraflutninga eftir miðnætti, flesta í miðbæ Reykjavíkur þar sem fólk sletti úr klaufunum í nótt. Það sé óvenjumikið.

„En það er samt minna en síðustu helgi, páskarnir voru mjög drjúgir í þessu,“ segir varðstjórinn.