Jesus undir hnífinn og frá keppni næstu mánuðina

Hinn 25 ára gamli framherji var í byrjunarliði Brasilíu sem tapaði óvænt 1-0 fyrir Kamerún í lokaleik riðlakeppninnar á heimsmeistaramótinu í fótbolta sem nú fer fram í Katar. Hann fór meiddur af velli eftir rúmlega klukkustund en upphaflega var talið var að hann yrði frá í 4-6 vikur vegna meiðslanna.

Sky Sports hefur nú greint frá því að framherjinn duglegi hafi þurft að fara undir hnífinn og hefur þegar hafið endurhæfingu. Arsenal vill ekki gefa upp hversu lengi hann verður frá keppni en talið er að um þrjá mánuði hið minnsta sé að ræða.

Það er því gefið að Jesus leikur ekki meira með Brasilíu á HM og þá mun hann missa af mikilvægum leikjum Arsenal í ensku úrvalsdeildinni. Skytturnar hefja leik að nýju strax á annan í jólum þegar West Ham United kemur í heimsókn.

Jesus gekk í raðir Arsenal síðasta sumar og er stór ástæða þess að liðið trónir á toppi deildarinnar með fimm stiga forskot enda hefur hann byrjað alla deildarleiki liðsins til þessa. Nú þarf Mikel Arteta, þjálfari Arsenal, að finna annan leikmann til að leiða línuna þar sem Jesus verður fjarri góðu gamni næstu mánuði.