Erlent

Bölsótaðist út í Vesturlönd

Samúel Karl Ólason skrifar
Vladimír Pútín, forseti Rússlands, með leppstjórum sínum úr fjórum héruðum Úkraínu eftir að þeir skrifuðu undir innlimunina.
Vladimír Pútín, forseti Rússlands, með leppstjórum sínum úr fjórum héruðum Úkraínu eftir að þeir skrifuðu undir innlimunina. AP/Mikhail Metzel

Vladimír Pútín, forseti Rússlands, segir að þau héruð Úkraínu sem hann innlimaði einhliða og ólöglega í rússneska sambandsríkið í dag tilheyri Rússlandi. Þau hafi tilheyrt rússneska keisaraveldinu og Sovétríkin hafi rekið Þjóðverja þaðan í seinni heimsstyrjöldinni.

Íbúar þessara fjögurra héraða muni nú í búa í „sögulegu föðurlandi þeirra“.

„Ég vil að ríkisstjórnin í Kænugarði og raunverulegir yfirmenn þeirra í vestrinu heyri í mér. Íbúar Donetsk, Luhansk, Saporisjía og Kherson eru að verða borgarar okkar, að eilífu,“ sagði Pútín.

Forsetinn hvatti því næst Úkraínumenn til að hætta átökum sínum við Rússa og semja um frið. Hann ítrekaði þó að ekki væri hægt að semja um héruðin fjögur, því búið væri að ákveða framtíð þeirra.

Þá sakaði Pútín Úkraínumenn um að hafa byrjað stríðið árið 2014, sem er fjarri því að vera satt því það voru Rússar sem gerðu innrás í Úkraínu það ár, innlimuðu Krímskaga og studdu aðskilnaðarsinna í austurhluta landsins gegn Úkraínumönnum.

Héruðin fjögur sem Pútín ætlar að innlima en Rússa hafa ekki fulla stjórn á neinu þeirra.Vísir

Ráðamenn í Úkraínu hafa gefið út að þeir muni ekki láta af árásum sínum gegn hersveitum Rússa í Úkraínu og muni frelsa öll héruð landsins. Bakhjarlar Úkraínu hafa einnig sagt að þeir muni ekki láta af stuðningi sínum við ríkið.

Þá er vert að benda á að Rússar stjórna ekki neinu af héruðunum fjórum að fullu og Úkraínumenn hafa sótt fram gegn Rússum í flestum þeirra á undanförnum vikum. Á meðan Pútín hélt ræðu sína berast fregnir af því að stór hópur umkringdra rússneskra hermanna í Lyman í Donetsk-héraði ætli sér að reyna að brjóta sér leið í gegnum umsátur Úkraínumanna og hörfa.

Talaði meira um Vesturlönd en Úkraínu

Pútín fór um víðan völl í 37 mínútna langri ræðu sinni og fór nokkuð frjálslega með söguna og hugtök eins og heimsvaldastefnu. Eitt skein þó í gegn í ræðu hans og það var að hún beindist að miklu leyti gegn Bandaríkjunum og bandamönnum þeirra og alþjóðakerfi sem byggist á lögum og rétti.

Með því er Pútín vilja stilla upp erfiðleikum Rússa í Úkraínu sem hluta af heildarbaráttu Rússa gegn spilltu alþjóðakerfi.

Forsetinn sakaði „engil-saxa“ um að bera ábyrgð á skemmdunum á Nord Stream gasleiðslunum og fór hann sömuleiðis ófögrum orðum um Atlantshafsbandalagið (NATO) og önnur hernaðarbandalög Bandaríkjanna.

Pútín sagðist vilja að Rússland leiddi einhverskonar andheimsvaldastefnu-hreyfingu til að frelsa heiminn undan oki „vestrænna rasista“. Hann ætlaði sér að skapa sanngjarnari alþjóðakerfi og sporna gegn alræði Vesturlanda.

Ýjaði að notkun kjarnorkuvopna

Þá sagði hann að Bandaríkin væru eina ríki heimsins sem hefði beitt kjarnorkuvopnum og bætti við að það hefði skapað fordæmi. Í ræðunni hét hann því einnig að nota allar leiðir til að verja hin nýju héruð Rússlands og var það enn ein vísun hans og annarra ráðamanna í Rússlandi um notkun kjarnorkuvopna.

Pútín sagði Vesturlönd ekki eiga rétt á því að gagnrýna landvinninga Rússlands í Úkraínu, vegna heimsvaldastefnu Vesturlanda og hélt því fram að þar hefði lítið breyst. Sagðist hann vera að berjast gegn heimsvaldastefnu með því innlima hluta annars ríkis.

Blaðamaður Financial Times í Rússlandi segist aldrei hafa séð aðra eins ræðu frá Pútín og að hann hafi aldrei verið jafn harðorður í garð Vesturlanda.

Sakaði Vesturlönd um satanisma og kvartaði yfir trans-fólki

Í langri ræðu sinni sakaði Pútín vesturlönd á einum tímapunkti um „satanisma“, kvartaði yfir trans-fólki á öðrum þar sem hann kvartaði einnig yfir fornöfnum og sagði rússnesk börn ekki eiga að kalla foreldra sína foreldri eitt og foreldri tvö í stað móður og föðurs. Þá ræddi hann mikilvægi kristinna gilda.

Hann sagði Vesturlönd óttast gildi Rússlands svo mikið að þau reyndu að ráða heimspekinga Rússlands af dögum. Það gæti verið tilvísun í sprengjuárás nærri Moskvu í sumar þar sem dóttir heimspekingsins Alexanders Dugin dó.

Sjá einnig: Segja morðingjann hafa verið með tólf ára dóttur sinni

Þá kvartaði Pútín yfir því að Sovétríkin hefðu liðast í sundur á sínum tíma og sagði að það hefði valdið Rússlandi gífurlegum skaða.

Pútín fjallaði einnig um orkumál í ræðu sinni og sagði meðal annars að ekki væri hægt að fæða fólk með bréf-dölum og evrum. Það væri ekki hægt að hita heimili með lygum sem fólk dreifði á samfélagsmiðlum. Það þyrfti orkugjafa.

Í frétt New York Times segir að ræðu Pútíns hafi verið beint að þremur markhópum. Hann hafi viljað réttlæta þá erfiðu tíma sem almenningur í Rússlandi stendur frammi fyrir. Hann hafi viljað koma því til skila til ráðamanna í Vesturlöndum að hann myndi ekki gefa eftir og að hann hafi viljað koma því enn og aftur á framfæri að hann gæti beitt kjarnorkuvopnum.

Pútín sem fór ítrekað með rangfærslur og ósannindi í ræðu sinni endaði hana svona:

„Sannleikurinn er með okkur. Rússland er með okkur!“

Tengdar fréttir

Umkringdir rússneskir hermenn sagðir hörfa frá Lyman

Úkraínumenn eru sagðir hafa nánast umkringt hóp rússneskra hermanna í borginni Lyman í norðanverðu Donetsk-héraði. Rússar eru sagðir undirbúa það að hörfa frá bænum á sama tíma og forseti Rússlands lýsir yfir innlimun héraðsins.

23 látnir og 28 særðir eftir árás í Zaporizhzhia

Að minnsta kosti 23 eru látnir og 28 særðir eftir árás á bílalest almennra borgara í Zaporizhzhia. Úkraínumenn segja Rússa hafa staðið að árásinni en Rússar segja Úkraínumenn ábyrga.

Sást til rússneskra herskipa nærri lekastaðnum í vikunni

Evrópskar öryggisstofnanir eru sagðar hafa fylgst með ferðum rússneskra herskipa nærri staðnum þar sem lekar komu á Nord Stream-gasleiðslurnar í Eystrasalti í vikunni. Atlantshafsbandalagið telur að um skemmdarverk hafi verið að ræða.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.