Rafmagnslaust á Kúbu vegna fellibylsins Ian

Atli Ísleifsson skrifar 28. september 2022 07:07

Veðurspár höfðu gert ráð fyrir að úrkoma gæti náð allt að þrjátíu sentimetrum á sumum svæðum á Kúbu. AP

Rafmagn er farið af á allri Kúbu eftir að fellibylurinn Ian gekk yfir vesturhluta eyjarinnar í gær og í nótt.

Ríkisstjórn landsins segir að rafkerfi landsins liggi nú alveg niðri eftir að ekki tókst að kveikja aftur á einu helsta orkuveri landsins, Antonio Guiteras.

Staðfest er að tveir hafa farist af völdum fellibylsins og þá hefur verið tilkynnt um að byggingar hafi víða eyðilagst í veðurofsanum. Áætlað er að um ellefu milljónir manna séu nú án rafmagns.

Veðurspár höfðu gert ráð fyrir að úrkoma gæti náð allt að þrjátíu sentimetrum á sumum svæðum á Kúbu.

Ian er nú þriðja stigs fellibylur þar sem hviður hafa náð allt að 54 metrum á sekúndu, en fellibylurinn nálgast nú Flórída og hefur verið að sækja í sig veðrið á ný. Áætlað er að hann muni ganga á land nærri Tampa á vesturstönd Flórídaskagans næstu nótt og nái svo inn í Georgíu aðfararnótt laugardagsins.

Ron DeSantis, ríkisstjóri Flórída, hefur lýst yfir neyðarástandi í ríkinu vegna komu Ians og hefur hann sett um fimm þúsund þjóðvarðliða í viðbragðsstöðu. Ríkisstjóri Georgíu hefur einnig lýst yfir neyðarástandi og sett um fimm hundruð þjóðvarðliða í viðbragðsstöðu.

Kúba Bandaríkin Náttúruhamfarir Fellibylurinn Ian

Tengdar fréttir

Ian búinn að ná landi á Kúbu

Fellibylurinn Ian hefur náð landi á Kúbu en yfirvöld þar hafa flutt um fimmtíu þúsund manns úr vegi fellibyljarins. Ian er þriðja stigs fellibylur og óttast Bandaríkjamenn að hann muni ná fjórða stiginu og ná landi á vesturströnd Flórída seinna í vikunni.

27. september 2022 10:19

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.