Erlent

Komin á skotpall fyrir fyrstu tunglferðina

Samúel Karl Ólason skrifar
Artemis-1 er komin á skotpall í Kennedy geimmiðstöðinni í Flórída.
Artemis-1 er komin á skotpall í Kennedy geimmiðstöðinni í Flórída. AP/Terry Renna

Starfsmenn Geimvísindastofnunar Bandaríkjanna (NASA) luku í dag við að flytja fyrstu eldflaug Artemis-áætlunarinnar á skotpall í Flórída. Var það gert fyrir fyrstu tunglferð áætlunarinnar en til stendur að skjóta eldflauginni á loft eftir tæpar tvær vikur.

Space Launch System (SLS) eldflaug verður notuð til að skjóta Orion geimfari í átt til tunglsins. Geimfarið verður ómannað og mun það ferðast rúmlega tvær milljónir kílómetra á rúmum 42 dögum og lenda í Kyrrahafinu þann 10. október.

Þetta geimskot kallast Artemis-1. Fyrsta mannaða tunglferðin verður Artemis-3 og verður það í fyrsta sinn sem menn fara til tunglsins frá Appollo-17 árið 1972. Vonast er til þess að Artemis-3 fari á loft árið 2025 eða 2026.

Þegar kemur að geimskotum eru allar áætlanir og dagsetningar háðar miklum breytingum

Um borð í geimfarinu verður mikið af vísindabúnaði. Má þar nefna nokkra smá gervihnetti sem kallast CubeSats og eiga meðal annars að leita að vatni á tunglinu, kortleggja gíga og greina yfirborð tunglsins nánar.

Einn af mörgum smágervihnöttum sem mun fara með Orion út í geim.NASA

Þessir smágervihnettir verða ekki eingöngu notaðir til að rannsaka tunglið. Nokkrir verða sendir langt út í sólkerfið og verða notaðir til að rannsaka geislun, taka myndir af smástirnum og prufukeyra plasma-hreyfla.

Geimfarið verður þar að auki búið skynjurum sem flesta á að nota til að greina alls konar geislun sem finna má í geimnum og rannsaka hvaða áhrif hún mun hafa á geimfara í löngum geimferðum.

Nánari upplýsingar um þennan vísindabúnað má finna í upplýsingapakka NASA um Artemis-1 hér á vef stofnunarinnar.

Hér á neðan má sjá stutt myndband sem útskýrir BioSentinel, sem er einn af þeim smágervihnöttum sem fylgja Orion út í geim.

Auk vísindabúnaðar verða þrjár gínur um borð. Þær kallast Commander Moonikin Campos, Helga og Zohar. Campos verður búinn fjölmörgum skynjurum og íklæddur sama búning og geimfarar munu vera í á næstu árum.

Þessum skynjurum er meðal annars ætlað að greina þá þyngdarkrafta sem Campos verður fyrir við geimskotið og geimferðina og einnig verða geislunarskynjarar í gínunni sem ætlað er að varpa ljósi á það hve mikilli geislun geimfarar verða fyrir svo langt frá hlífðarhjúpi jarðarinnar.

Gínan Commander Moonikin Campos.NASA

Helga og Zohar eru bara tveir búkar sem hannaðir eru til að líkjast mannslíkömum og verða gínurnar búnar rúmlega 5.600 skynjurum og 34 geislunarmælum. Zohar verður klædd vesti sem á að verja gínuna gegn geislun en Helga verður óvarin.

Þannig vilja vísindamenn NASA kanna hve vel slíkur hlífðarbúnaður virkar. Verði geimför framtíðarinnar fyrir sólstormum gætu geimfarar farið úr sérstökum geislunarskýlum geimfara og haldið störfum sínum áfram á mikilvægum og viðkvæmum köflum geimferða.


Tengdar fréttir

Styttist í fyrstu tunglferðina

Forsvarsmenn Geimvísindastofnunnar Bandaríkjanna (NASA) hafa sett stefnuna á því að fyrsta tunglferð Artemis-áætlunarinnar verði farin þann 29. ágúst. Þá verður geimfari skotið til tunglsins og flogið hring þar í kring og til baka.

Opin­ber­uð­u hverj­ir þróa geimb­ún­ing­a fram­tíð­ar­inn­ar

Geimvísindastofnun Bandaríkjanna (NASA) hefur gert samninga við Axiom Space og Collins Aerospace um þróun og framleiðslu geimbúninga og búnaðar til geimgangna. Þennan búnað eiga meðal annars geimfarar Artemis-áætlunarinnar að nota á braut um jörðu og á yfirborði tunglsins.

Öflugasta eldflaugin aftur á skotpall fyrir tunglskot

Geimvísindastofnun Bandaríkjanna (NASA) tilkynnti um helgina að hefja ætti aftur æfingar fyrir fyrsta geimskot Space Launch System-eldflaugarinnar. Það eigi að gerast snemma í næsta mánuði en samskonar æfingu var hætt í byrjun apríl vegna bilana.

Vilja herma eftir björnum og leggja geimfara í dvala

Vísindamenn Geimvísindastofnunar Evrópu (ESA) leita nú leiða til að setja geimfara framtíðarinnar í dvala, ekki ósvipað því sem bjarndýr gera á veturna. Þannig væri hægt að spara gífurlega mikið magn matar, vatns og annarra birgða sem eru mönnum nauðsynlegar.

Annað hvort dreifum við okkur um Vetrarbrautina eða deyjum út

Mannkynið er dauðadæmt, dreifi það sér ekki um sólkerfið og jafnvel lengra en það. Án þess að mannkynið verði tegund margra reikistjarna er tölfræðilega óhjákvæmilegt að það muni þurrkast út. Hvort sem það gerist á næstu áratugum eða jafnvel milljörðum ára, þá munum við deyja og jörðin þurrkast út.

Fyrsta eldflaug Artemis sett saman og stefnt á geimskot til tunglsins snemma á næsta ári

Starfsmenn Geimvísindastofnunar Bandaríkjanna (NASA) hafa lokið samsetningu fyrstu eldflaugarinnar af þeirri gerð sem bera á menn til tunglsins á nýjan leik og jafnvel til Mars. Orion geimfari var komið fyrir á toppi SLS-eldflaugar í Flórída í síðustu viku en eldflauginni verður ekki skotið á loft fyrr en í fyrsta lagi í febrúar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×