Fótbolti

HK og Selfoss með sigra og Kórdrengir björguðu stigi

Hjörtur Leó Guðjónsson skrifar
Valgeir Valgeirsson skoraði annað mark HK í kvöld.
Valgeir Valgeirsson skoraði annað mark HK í kvöld. Vísir/Vilhelm

Þrír leikir fóru fram í Lengjudeild karla í fótbolta í kvöld. HK vann 2-0 sigur gegn Aftureldingu, Selfyssingar eru enn taplausir eftir 4-0 sigur gegn Þrótti Vogum og Kórdrengir björguðu stigi er liðið gerði 1-1 jafntefli gegn Fjölni.

Stefán Ingi Sigurðarson skoraði fyrra mark HK þegar hann kom liðinu í forystu á lokamínútu fyrri hálfleiks. Það var svo Valgeir Valgeirsson sem tryggði liðinu sigur með góðu marki þegar tæpur stundarfjórðungur var til leiksloka.

HK er nú með sex stig eftir fyrstu fjóra leiki tímabilsins og situr í fimmta sæti deildarinnar. Afturelding situr hins vegar í tíunda sæti með tvö stig og liðið er enn í leit að sínum fyrsta sigri.

Þá unnu Selfyssingar afar sannfærandi 4-0 sigur gegn Þrótti Vogum þar sem Gonzalo Zamorano skoraði fyrstu tvö mörk Selfyssinga. Gary Martin bætti þriðja markinu við á 75. mínútu áður en Alexander Clive Vokes gerði endanlega út um leikinn með marki á seinustu mínútu leiksins.

Selfyssingar eru nú á toppi Lengjudeildarinnar með 10 stig eftir fjóra leiki og liðið hefur ekki enn tapað leik. Þróttur Vogum situr hins vegar í næst neðsta sæti með aðeins eitt stig.

Að lokum reyndist Þórir Rafn Þórisson hetja Kórdrengja þegar hann tryggði liðinu 1-1 jafntefli á útivelli gegn Fjölni. Reynir Haraldsson hafði komið heimamönnum yfir á lokamínútu fyrri hálfleiks, en Þórir jafnaði metin á lokamínútu síðari hálfleiks.

Fjölnismenn eru því með sjö stig eftir fyrstu fjóra leiki sína og sitja í þriðja sæti. Kórdrengir hafa fengið tveimur stigum minna og sitja í sjöunda sæti.




Fleiri fréttir

Sjá meira


×