„Mjög fínt að hafa pabba sinn til að bakka sig upp“

Arnar Þór Viðarsson landsliðsþjálfari fékk Jóhannes Karl inn sér til aðstoðar í janúar og Skagamaðurinn er því í fyrsta sinn með landsliðinu sem þjálfari nú þegar það er komið til Spánar, vegna vináttulandsleikja við Finnland og Spán.

„Fyrst og fremst, sem leikmaður liðsins, er ég mjög ánægður með að hafa hann. Hann hefur komið mjög vel inn í þetta, ég veit hversu góður þjálfari hann er og hann mun hjálpa okkur mjög mikið. Sem sonur hans er mjög skemmtilegt að fá að hitta hann aðeins meira,“ segir Ísak sem ræddi við fjölmiðlamenn í gegnum tölvuna frá Spáni í dag.

Áður en að Jóhannes Karl hóf þjálfaraferil sinn lék hann 34 A-landsleiki og skoraði í þeim eitt mark, rétt eins og hinn 18 ára gamli Ísak hefur nú gert í fyrstu tíu A-landsleikjum sínum.

Engin stríðni frá liðsfélögunum

Ísak fagnar því mjög að hafa fengið pabba sinn inn í þjálfarateymi landsliðsins og Ísak segist hafa sloppið við pabbatengda stríðni frá liðsfélögunum hingað til:

„Þetta er mjög eðlilegt allt saman. Í fortíðinni hefur auðvitað verið mikið um tengingar í íslenska landsliðinu svo þetta er ekkert nýtt, og ég finn ekkert fyrir því núna,“ segir Ísak en til að mynda léku bræðurnir Sveinn Aron og Andri Lucas Guðjohnsen með landsliðinu þegar Eiður Smári, forveri Jóhannesar Karls, var aðstoðarlandsliðsþjálfari. 

Pabbinn og Arnar með skýra sýn varðandi varnarleikinn

Ísak hefur alla tíð fengið góða leiðsögn frá pabba sínum:

„Við tölum mjög mikið saman um fótbolta utan vallar. Ég heyri reglulega í honum eftir leiki og ég held að við munum bara halda í það núna þegar við erum saman í liði. Svo er líka bara mjög fínt að hafa pabba sinn til að bakka sig upp, hvar sem maður er. Mér finnst þetta mjög skemmtilegt,“ segir Ísak. En hvað kemur Jóhannes Karl með sem þjálfari inn í landsliðið?

„Hann er með mjög svipaða sýn á fótbolta og Arnar. Við viljum halda áfram að þróa okkar system, með hápressuna og hvernig við verjumst sérstaklega. Við vitum að við erum með mjög góða leikmenn innanborðs, sem eru með mikil gæði, og ef við náum að stilla okkur saman í varnarleiknum þá getum við gert mjög góða hluti. Ég held að hann [Jóhannes Karl] og Arnar séu með skýra sýn um hvernig þeir ætli að gera þetta á þessu ári.“

Ísland mætir Finnlandi á laugardaginn klukkan 16, í beinni útsendingu á Stöð 2 Sport, og svo Spáni næstkomandi þriðjudag. Leikirnir eru liður í undirbúningi fyrir Þjóðadeildina í júní.