Innlent

Átakshópur í húsnæðismálum skilar tillögum í apríl

Heimir Már Pétursson skrifar
Átakshópur á vegum þjóðhagsráðs á að skila tillögum í apríl um hvernig bregðast eigi við miklum skorti á íbúðarhúsnæði.
Átakshópur á vegum þjóðhagsráðs á að skila tillögum í apríl um hvernig bregðast eigi við miklum skorti á íbúðarhúsnæði. Vísir/Vilhelm

Átakshópur á vegum þjóðhagsráðs verður endurvakinn og á að skila tillögum að lausnum í húsnæðismálum í apríl. Forsætisráðherra segir húsnæðisskort blasa við og grípa þurfi til aðgerða til að auka fraboðið.

Fyrir gerð kjarasamninga árið 2019 var skipaður átakshópur til að koma með tillögur í húsnæðismálum. Katrín Jakobsdóttir forsætisráðherra segir að ákveðið hafi verið á fundi þjóðhagsráðs á dögunum að endurvekja hópinn vegna stöðunnar á húsnæðismarkaðnum.

“Ég held að við séum öll sammála um það í þjóðhagsráði þar sem sitja aðilar vinnumarkaðarins, fulltrúar ríkis- og sveitarfélaga og Seðlabanka að þetta er mjög stórt viðfangsefni,” segir Katrín.

Það blasi þó aðeins annars konar áskoranir við nú en árið 2019 þegar mikið hafi áunnist. Stór hluti af þeim íbúðum sem byggðar voru eftir það hafi átt rætur í tillögum átakshópsins.

Forsætisráðherra segir ríki, sveitarfélög, aðila vinnumarkaðarins og aðila á markaði verða að koma sameiginlega að því að skapa lausnir í húsnæðismálum.Vísir/Vilhelm

„Þar vil ég sérstaklega nefna stofnframlög til almenna íbúðakerfisins og hlutdeildarlánin. Sem gerir það að verkum að við erum að sjá fleiri fyrstu kaupendur á markaðnum. Það sem blasir við núna hins vegar er skortur á framboði. Við erum að sjá mannfjöldaspá Hagstofunnar sem segir okkur að þörfin er að aukast meira en áður var talið. Við erum ennþá með uppsafnaða þörf frá árunum eftir hrun. Þannig að það er alveg ljóst að það þarf að grípa til aðgerða til að auka hér framboð á húsnæði,“ segir forsætisráðherra.

Það snúist um lóðir, skipulagningu lóða og uppbyggingu á fjölbreyttu húsnæði sem henti ólíkum hópum. Átakshópurinn sem nú verið endurvakinn muni meðal annars skoða aukin framlög ríkisins í almenna húsnæðiskerfið.

Í aðdraganda lífskjarasamninganna árið 2019 var myndaður átakshópur á vegum þjóðhagsráðs sem skilaði tillögum sem meðal annars leiddu til framlaga ríkisins til byggingar stéttafélaga og annarra óhagnaðardrifinna félaga í almenna húsnæðiskerfinu.Vísir/Vilhelm

„Þau eiga að vinna hratt eins og fyrri daginn. Þeirra verkefni er sérstaklega að horfa á framboðshliðina og skoða stöðu þeirra sem höllustum fæti standa þegar kemur að húsnæðismarkaðnum,“ segir Katrín.

Í fréttum okkar á sunnudag fyrir viku sögðum við frá því að Íslendingar fjölguðu sér ekki nóg til að anna eftirspurn eftir vinnuafli á öllum sviðum samfélagsins. Því þyrftu um tólf þúsund manns að flytja varanlega til landsins á næstu fjórum árum.

„Þá þarf að horfa til húsnæðismála og annarra innviða. Það er alveg ljóst að til að takast á við vaxandi fjölda sem og uppsafnaða þörf kallar á samstillt átak. Bæði ríkis og sveitarfélaga en ekki síður allra aðila í raun og veru sem sitja við borðið. Þá er ég að tala um aðila vinnumarkaðarins og svo auðvitað allra aðila á markaði sem eru í þessum verkefnum,“ segir Katrín Jakobsdóttir.


Tengdar fréttir

Seðlabankinn vill draga úr neyslu heimilanna

Seðlabankastjóri segir hækkun meginvaxta meðal annars eiga að stuðla að því að almenningur dragi úr neyslu sinni. Komandi kjarasamningar ráði úrslitum um hversu mikið bankinn þurfi að hækka meginvexti sína til viðbótar við 0,75 prósentustiga hækkun þeirra í dag.

Tillaga Samfylkingarinnar féll í grýttan farveg í Seðlabankanum

Ásgeir Jónsson seðlabankastjóri sagði á fundi Seðlabankans í dag að bankinn væri ekki hrifinn af þensluhvetjandi aðgerðum, á borð við þær sem þingmenn Samfylkingarinnar hafa lagt til, á meðan bankinn reynir að hemja eftirspurn.

Seðla­banka­stjóri segir komandi kjara­samninga ráða úr­slitum

Verðbólga er þrálátari en fyrri spár Seðlabankans gerðu ráð fyrir og mun ekki nálgast tveggja komma fimm prósenta markmið hans fyrr en eftir þrjú ár. Seðlabankastjóri segir komandi kjarasamninga ráða miklu um hversu mikið vextir þurfi að hækka til viðbótar á komandi misserum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×