Enski boltinn

Benitez: „Það var allt á móti okkur“

Hjörtur Leó Guðjónsson skrifar
Rafa Benitez segir að VAR-herbergið hafi verið á móti sínum mönnum í gærkvöldi. Hann hrósaði leikmönnum liðsins þó fyrir það að gefast ekki upp.
Rafa Benitez segir að VAR-herbergið hafi verið á móti sínum mönnum í gærkvöldi. Hann hrósaði leikmönnum liðsins þó fyrir það að gefast ekki upp. Gareth Copley/Getty Images

Knattspyrnustjóri Everton, Rafa Benitez, hefur líklega setið í heitasta sætinu í ensku úrvalsdeildinni undanfarnar vikur eftir vægast sagt slæmt gengi liðsins. Sigur Everton gegn Arsenal í gærkvöldi var fyrsti deildarsigur liðsins síðan í lok september, og Spánverjinn var að vonum feginn.

„Það er augljós að þegar stuðningsmennirnir, leikmennirnir og allir aðrir standa saman þá erum við sterkari,“ sagði Benitez í samtali við Sky Sports í gær.

Eins og oft áður var myndbandsdómgæslan í aðalhlutverki í leik gærkvöldsins, en meðal annarra atvika voru tvö mörk dæmd af Everton vegna rangstöðu. Benitez hrósaði sínum mönnum fyrir það hvernig þeir tókust á við það.

„Hvernig liðið brást við því að mörkin hafi verið dæmd af og við því að fá á sig mark undir lok fyrri hálfleiks, við brugðumst við því og skoruðum mörk. Hver einasti stuðningsmaður og leikmaður býst við því. Við erum allri mjög ánægðir og vonandi er þetta skref í rétta átt.“

Benitez hafði þó ekki lokið sér af í umræðunni um myndbandsdómgæsluna, og segir hana hafa verið á móti sínu liði.

„Myndbandsdómgæslan - ég veit ekki hvort að línurnar geti verið breiðari eða ekki. Hún var allavega á móti okkur. Ég hef oft sagt að við erum oft mjög nálægt því að vinna. Í kvöld var annað dæmi. Það var allt á móti okkur, en karakterinn sem leikmenn sýndu í kvöld, með stuðningsmennina á bakvið sig. Þeir mega alveg njóta þess,“ sagði Benitez að lokum.

Everton er nú í 12. sæti deildarinnar með 18 stig eftir 15 leiki, en liðið var án sigurs í seinustu átta leikjum í ensku úrvalsdeildinni.

Þá var annað atvik í leiknum þar sem myndbandsdómgæslan var í aðalhlutverki þegar Ben Godfrey, varnarmaður Everton, virtist stíga á andlit Takehiro Tomiyasu. Mikel Arteta, þjálfari Arsenal, vildi hins vegar tjá sig sem minnst um það mál.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.